கடலூர் சிறையில் கே.என்.நேருவை சந்திக்க அழகிரிக்கு அனுமதி மறுப்பு

நில அபகரிப்பு வழக்கில் குற்றம்சாட்டப்பட்டு, கடலூர் மத்திய சிறையில் அடைக்கப்பட்டு இருக்கும் முன்னாள் அமைச்சர் கே.என்.நேருவைச் சந்திக்க, மத்திய அமைச்சர்கள் மு.க. அழகிரி, நெப்போலியன் ஆகியோருக்கு சிறை அதிகாரிகள், செவ்வாய்க்கிழமை அனுமதி மறுத்து விட்டனர்.

கே.என்.நேருவைச் சந்திக்க மு.க.அழகிரி, நெப்போலியன் ஆகியோர் செவ்வாய்க்கிழமை காலை 10.35 மணிக்கு, கடலூர் மத்திய சிறைக்கு வந்தனர். ஆனால் அவர்கள் கே.என்.நேருவைச் சந்திக்க, சிறை அதிகாரிகள் அனுமதி மறுத்து விட்டனர்.

கடலூர் மத்திய சிறையில் திங்கள்கிழமை, புதன்கிழமை மற்றும் வெள்ளிக்கிழமை மட்டுமே விசாரணைக் கைதிகளை சந்திக்க அனுமதி உண்டு என்றும், செவ்வாய்க்கிழமை மற்றும் வியாழக்கிழமைகளில் குண்டர் சட்டத்தில் கைது செய்யப்பட்டவர்களைச் சந்திக்கலாம் என்றும் சிறைச்சாலை அதிகாரிகள் தெரிவித்தனர்.

எனவே குண்டர் சட்டத்தில் கைது செய்யப்பட்டு, கடலூர் சிறையில் இருக்கும் மதுரை 3-வது பகுதி ஒச்சி பாலுவை மட்டும் மு.க.அழகிரியும், நெப்போலியனும் மற்றும் அவர்களுடன் வந்து இருந்த மதுரை பி.எம்.மன்னன் ஆகியோர் சந்தித்துப் பேசிவிட்டு காலை 11 மணிக்குத் திரும்பி விட்டனர்.

பின்னர் மு.க. அழகிரி செய்தியாளர்களிடம் பேசுகையில், "கே.என்.நேருவைப் பார்க்க அனுமதி மறுத்து விட்டனர். ஒச்சி பாலுவை மட்டும் சந்தித்தோம். தி.மு.க.வினரைக் கைது செய்வதில் ஏற்கெனவே 100 நாள் சாதனை படைத்த முதல்வர் ஜெயலலிதா, தற்போது 150 நாள்கள் சாதனையாக்கி இருக்கிறார்.

ராஜீவ் காந்தி கொலை வழக்கில் மரண தண்டனை விதிக்கப்பட்ட மூவரது தூக்குத் தண்டனையை ரத்து செய்வது குறித்து, தி.மு.க. கழகத்தின் நிலைப்பாடே எனது நிலைப்பாடும்.

பிரதமருக்கும் ஜனாதிபதிக்கும் தி.மு.க. தலைவர் கருணாநிதி முறையீடு செய்து இருக்கிறார்.

உள்ளாட்சித் தேர்தலையும் திருச்சி இடைத் தேர்தலையும் சீர்குலைக்கவே, தி.மு.க.வினரை முதல்வர் ஜெயலலிதா கைது செய்து, சிறையில் அடைத்து வருகிறார்.

கைது நடவடிக்கைகளைத் தடுக்க நான் ஏற்கெனவே சொன்னபடி, நாங்கள் ஆட்சிக்கு வரும்போது நடவடிக்கை எடுப்போம் என்றார் அழகிரி.

கடலூர் சிறைக்கு வந்த மு.க.அழகிரியை வரவேற்க முன்னாள் எம்.எல்.ஏ. இள.புகழேந்தி, கடலூர் நகராட்சித் தலைவர் து.தங்கராசு, முன்னாள் நகராட்சித் தலைவர் ஏ.ஜி.ராஜேந்திரன் உள்ளிட்டோர் வந்து இருந்தனர்.

தினமணி