விநாயகர் சதுர்த்தி :18 ஆயிரம் போலீஸ் குவிப்பு

Print | E-mail
புதன்கிழமை, 31, ஆகஸ்ட் 2011 (21:49 IST)



விநாயகர் சதுர்த்தி :18 ஆயிரம் போலீஸ் குவிப்பு

விநாயகர் சதுர்த்தி விழா நாளை கொண்டாடப்படுகிறது. இன்று முதல் நகரின் பல இடங்களில் விநாயகர் சிலைகள் வைக்கப்பட்டு, வழிபாடு நடத்தப்படுகிறது. இதையொட்டி நகரில் 18 ஆயிரம் போலீசார் பாதுகாப்பு பணியில் ஈடுபடுத்தப்படுகின்றனர்.


நாடு முழுவதும் விநாயகர் சதுர்த்தி விழா நாளை கோலாகலமாக கொண்டாடப்படுகிறது. சென்னையிலும் விநாயகர் சதுர்த்தி விழா கொண்டாட்டங்கள் தொடங்கிவிட்டன. நகரின் பல இடங்களில் விதவிதமான விநாயகர் சிலைகள் வைக்கப்படுகின்றன.

இந்த சிலைகள் இன்று மாலை பிரதிஷ்டை செய்யப்பட்டு, விசேஷ பூஜைகள் நடத்தப்படுகின்றன. கோயில்களிலும் சிறப்பு பூஜைகள் நடக்கின்றன.


மயிலாப்பூர் லஸ் பகுதியில் உள்ள நவசக்தி விநாயகர் கோயிலில் சதுர்த்தி விழா ஏற்பாடுகள் செய்யப்பட்டுள்ளன.

திருச்சி மலைக்கோட்டை, மதுரை மீனாட்சி கோயில் முக்குருணி விநாயகர், பிள்ளையார்பட்டி உள்ளிட்ட கோயில்களில் சதுர்த்தி விழா உற்சாகமாக கொண்டாடப்படுகிறது.

இதுதவிர, வீடுகளில் சிறிய களிமண் பிள்ளையார் சிலைகளை வைத்து மக்கள் வழிபடுவர்.


முக்கிய சாலைகளில் விநாயகர் சிலை வைக்க போலீசாரிடம் அனுமதி பெற வேண்டும். கடந்த சில ஆண்டுகளாகவே, தமிழகத்தில் விநாயகர் சிலைகள் வைக்க மாசு கட்டுப்பாடு வாரியம் மற்றும் போலீசார் கடும் நிபந்தனைகளை விதித்து வருகின்றனர்.


களிமண் போன்ற எளிதில் கரையும் பொருட்களால் செய்யப்பட்ட சிலைகளையே வைக்க வேண்டும். மாசு ஏற்படுத்தும் பொருட்களால் சிலைகளை தயார் செய்யக் கூடாது. அதிக உயரமான சிலைகளை வைக்கக் கூடாது என பல கட்டுப்பாடுகள் விதிக்கப்பட்டுள்ளன.


சென்னை மற்றும் புறநகர் பகுதிகளில் 1300 இடங்களில் சிலை வைக்க போலீசார் அனுமதி கொடுத்துள்ளனர். 4 முதல் 10 அடி வரை உயரம் உள்ள சிலைகளை மட்டுமே வைக்க அனுமதி தரப்பட்டுள்ளது. திருவல்லிக்கேணி திருவட்டீஸ்வரன்பேட்டை, புதுப்பேட்டை, புளியந்தோப்பு, வேப்பேரி, கே.கே.நகர், கோடம்பாக்கம், தி.நகர், குரோம்பேட்டை, தாம்பரம் ஆகிய இடங்களில் 10 அடி உயர சிலைகள் வைக்க விழா குழுவினர் முடிவு செய்துள்ளனர். 1300 இடங்களில் 2 ஆயிரத்துக்கும் அதிகமான சிலைகள் வைக்கப்பட உள்ளன.


விநாயகர் சதுர்த்தி விழாவையொட்டி நகரில் பலத்த பாதுகாப்பு ஏற்பாடுகள் செய்யப்பட்டுள்ளன. முக்கியமான இடங்களில் வைக்கப்படும் சிலைகளுக்கு துப்பாக்கி ஏந்திய போலீஸ் பாதுகாப்பு போடப்படுகிறது. விழா கமிட்டியினரும் சிலை அருகில் பாதுகாப்புக்கு இருக்க வேண்டும் என்று உத்தரவிடப்பட்டுள்ளது.


நகர் முழுவதும் சுமார் 18 ஆயிரம் போலீசார் பாதுகாப்பு பணியில் ஈடுபடுத்தப்பட உள்ளனர். இரவில் வாகன சோதனை நடத்தவும் லாட்ஜ், ஓட்டல்களில் சோதனை நடத்தவும் உத்தரவிடப்பட்டுள்ளது. முன்னெச்சரிக்கை நடவடிக்கையாக சமூக விரோதிகள், ரவுடிகளை கைது செய்யவும், அவர்களை தொடர்ந்து கண்காணிக்கவும் உத்தரவிடப்பட்டுள்ளது.


பொது இடங்களில் வைக்கப்படும் விநாயகர் சிலைகள் சனி மற்றும் ஞாயிற்றுக்கிழமைகளில் ஊர்வலமாக எடுத்துச் சென்று கடலில் கரைக்க போலீசார் அனுமதி கொடுத்துள்ளனர். நீலாங்கரை பல்கலை நகர், பட்டினப்பாக்கம் சீனிவாசபுரம், ராயபுரம், காசிமேடு மீன்பிடி துறைமுகம் மற்றும் காசிமேடு கடற்கரை ஆகிய 5 இடங்களில் சிலைகளை கரைக்க அனுமதி அளிக்கப்பட்டுள்ளது. நக்கீரன்

பிரச்சனை ஏற்படமால் நல்ல முறையில் நடந்தால் அனைவருக்கும் நல்லது ,,,,,,,,,,