அழகு சிகிச்சை குறிப்புகள்...

கண் இமைகளுக்கு மஸ்காரா போடுவது இமைகளை அடர்த்தியாக்குமா?


சரிதான். மஸ்காரா என்பது இமைகளை அழகாக்கும்தான். ஆனால் அன்றன்று அதை அகற்றி விட வேண்டும். அப்படியே விட்டால் இமை முடிகள் உடைந்து, உதிர்ந்து போகும். தினசரி மஸ்காரா உபயோகிப்பதைத் தவிர்த்து, எப்போதேனும் அரிதாக, பார்ட்டி மற்றும் விசேஷங்களுக்குச் செல்கிற போது போடுவது நல்லது.




பவுண்டேஷன் அதிகம் உபயோகித்தால், முகத்திலுள்ள சுருக்கங்களை, கோடுகளை மறைக்கலாம்?


இரண்டு கோட் அதிகம் போட்டால் இப்படித்தான் முகச் சுருக்கங்களை மறைக்கலாம் என்று பலரும் தவறாக நினைத்துக் கொண்டிருக்கிறார்கள். எவ்வளவு அதிகமாக பவுண்டேஷன் உபயோகிக்கிறீர்களோ, அத்தனையும் முகச் சுருக்கங்களின் உள்ளே போய் செட்டிலாகும். முகத்தில் நீங்கள் காட்டுகிற ஒவ்வொரு அசைவையும் அந்தக் கோடுகள் பிரதிபலிக்கும். வயதாக, ஆக மிக லைட்டான, கனமில்லாத பவுண்டேஷனையே உபயோகிக்க வேண்டும். அதுதான் கோடுகளை மறைத்துக் காட்டும்.




கண்களுக்குள் மை தீட்டிக் கொள்வது கண்களைப் பெரிதாகக் காட்டும்?


உண்மையில் கண்களைப் பெரிதாகக் காட்ட நினைப்பவர்கள் கண்களுக்குள் இப்படி மை தீட்டவே கூடாது. கண்ணின் கீழ்ப்பகுதியில் வெண்மையாக உள்ள இடத்தில் கருப்பு நிறத்தில் மை தீட்டினால் கண்களின் அளவு இன்னும் சிறுத்துதான் தெரியும். எனவே கண்களைப் பெரிதாகக் காட்டிக் கொள்ள விரும்புவோர் கண்களுக்கடியில் வெள்ளை நிறப் பென்சிலால் வரைந்து கொள்வதே சரி.




கன்னங்களில் அதிக பிளஷர் உபயோகிப்பது முகத்துக்குக் கூடுதல் அழகு?


பிளஷர் தடவிக் கொள்ளவென ஒரு கணக்கு உண்டு தெரியுமா? அதாவது கண்ணாடிக்கும், நீங்கள் நிற்கிற இடத்துக்கும் குறைந்தது 1.5 மீட்டர் இடைவெளி இருக்க வேண்டுமாம். ஆனால் பெரும்பாலான பெண்கள் கண்களைப் பறிக்கும் வெளிச்சத்தின் அடியில் கண்ணாடிக்கு அருகில் நின்றபடி தடவிக் கொள்வார்கள். அப்போது அது அசிங்கமாகத் தெரியாது. வீட்டை விட்டு வெளியே வந்த பிறகு பார்த்தால் கோமாளி மாதிரியே இருப்பார்கள். கல்யாண மேக்கப் மாதிரி ரொம்பவும் முக்கியமான மேக்கப்புகளில் தான் பிளஷர் அவசியம். மற்றபடி அது தேவையே இல்லை அப்படியே தேவைப்பட்டாலும் போதிய இடைவெளியில் நின்று கொண்டு, மிதமாகத் தடவிக் கொள்ள வேண்டும்.




உதடுகளுக்கு ஒரு நிறத்தில் அவுட்லைனும், வேறு நிறத்தில் லிப்ஸ்டிக்கும் உபயோகிப்பது உதடுகளைப் பெரிதாகக் காட்டும்?


உதடுகளைப் பெரிதாகக் காட்ட இது சரியான வழியில்லை. இப்படிச் செய்தால் உதடுகள் செயற்கையாகத் தெரியும். லிப்ஸ்டிக்கும், லிப்லைனரும் ஒரே நிறத்தில் இருந்தால்தான் உதடு களைப் பெரிதாகக் காட்டச் செய்ய முடியும்.



கண்களுக்கான ஐ ஷேடோவும் சரி, உதடுகளுக்கான லிப்ஸ்டிக்கும் சரி- பிங்க் நிறம்தான் அழகு?


ரோஜாப்பூ நிற சருமம் கொண்டவர்களுக்கு பிங்க் நிற ஐ ஷேடோவும், லிப்ஸ்டிக்கும் கொள்ளை அழகுதான். ஆனால் மாநிறமான, சுமாரான நிறம் கொண்டவர்களுக்கு அது செயற்கையாகவே தெரியும்.



மாலை நேரத்துக்கு டார்க் நிற பவுண்டேஷனே சிறந்தது?


பொதுவாகவே மேக்கப் செய்து கொள்கிற போது பலரும் முகத்துக்கு மட்டும் செய்வார்கள். கழுத்து, காதுகளைக் கூடக் கவனத்தில் கொள்ள மாட்டார்கள். அதுவும் மாலை நேர மேக்கப் என்று வரும் போது செயற்கை வெளிச்சத்தில் நன்றாகத் தெரிய வேண்டுமே என்ற எண்ணத்தில் கொஞ்சம் கூடுதலாகவும், டார்க் நிறத்திலும் பவுண்டேஷன் உபயோகிப்பார்கள். செயற்கை வெளிச்சத்தில் கழுத்திலிருந்து முகம் வரை ஒரு நிறத்திலும், அதற்குப் பிறகான சரும நிறம் வேறு நிறத்திலுமாக அசிங்கமாகத் தெரியும். இதைத் தவிர்க்க, தாடைப் பகுதியில் பவுண்டேஷனைத் தடவிப் பார்த்து விட்டு வெளிச்சத்தில் பார்த்து மிதமாகவே உபயோகிக்கலாம்.


30 வயதுக்கு மேலான பெண்கள், மேட் பினிஷ் ஐ ஷேடோவையே உபயோகிக்க வேண்டும்?


மேட் பினிஷ ஐட்டங்கள் பார்ப்பதற்கு ஒரு மாதிரி வறண்ட, உலர்ந்த தோற்றத்தைத் தரும். சுருக்கங்களும், கோடுகளும் ஆரம்பிக்கிற இந்த வயதில், இம்மாதிரி மேட் பினிஷ ஐ ஷேடோவும், லிப்ஸ்டிக்கும் செயற்கையாகத் தெரியும். லேசாக பளபளப்பு கொண்ட ஐட்டங்கள் இந்த வயதினருக்கு அழகாக இருக்கும்.

நன்றி பூவையர் பூங்கா