மேயர் பதவிக்கு நேரடி தேர்தல்

செவ்வாய்க்கிழமை, 30, ஆகஸ்ட் 2011 (14:55 IST)


மேயர் பதவிக்கு நேரடி தேர்தல்

மாநகராட்சியில் மேயர்கள் மற்றும் நகராட்சிகளில் தலைவர்களை மக்கள் நேரடியாகவே தேர்ந்தெடுக்க வகை செய்யும் மசோதா இன்று சட்டசபையில் தாக்கல் செய்யப்பட்டது. இதுவரையிலும் மாநகராட்சிகளின் மேயர்கள் மற்றும் நகராட்சி தலைவர்களை கவுன்சிலர்கள் தேர்ந்தெடுக்கும் முறை இருந்து வந்தது.


இவ்வாறு தேர்ந்தெடுக்கப்படும் தலைவர்களும், மேயர்களும் அவர்கள் தேர்ந்தெடுக்கப்பட்ட பகுதிகளில் மட்டுமே கவனம் செலுத்துவதால் ஒட்டு மொத்த மாநகராட்சி மற்றும் நகராட்சி பகுதிகளில் உள்ள மக்கள் நேரடியாக அவர்களை தேர்ந்தெடுக்க இந்த புதிய மசோதா வகை செய்கிறது.

இந்த மசோதாவை நகராட்சி நிர்வாகம் மற்றும் ஊரக வளர்ச்சித் துறை அமைச்சர் கே.பி.முனுசாமி இன்று சட்டசபையில் தாக்கல் செய்தார். இந்த மசோதாவில்,

’’தற்போது மாநகராட்சிகளின் மேயர்களும், மற்றும் நகராட்சிகளின் தலைவர்களும் மன்ற உறுப்பினர்களால் அவர்களுக்கு இடையே இருந்து தேர்ந்தெடுக்கப்படுகிறார்கள்.

பெரும்பாலான மேயர்கள் அல்லது தலைவர்கள் மாநகராட்சி மற்றும் நகராட்சி பகுதி முழுவதின் மேம்பாட்டிலும் கவனம் செலுத்துவதற்கு பதிலாக தாங்கள் தேர்ந்தெடுக்கப்பட்ட பகுதியின் மீது மட்டுமே அதிக கவனம் செலுத்துகிறார்கள் என்பது அரசின் கவனத்திற்கு கொண்டு வரப்பட்டிருக்கிறது.


எனவே மாநகராட்சியின் மேயருக்கான மற்றும் நகராட்சியின் தலைவருக்கான தேர்தல் முறையை மறைமுக தேர்தல் முறையிலிருந்து நேரடி தேர்தல் முறைக்கு மாற்றுவதென்று அரசு முடிவு செய்துள்ளது. அது மாநகராட்சிகள் மற்றும் நகராட்சிகளின் மேம்பட்ட நிர்வாகத்திற்கு எளிதாக வழிவகுக்கும்.


மக்களுக்கு இன்னமும் திறம்பட்ட முறையிலும் விரைவாகவும், பொதுப் பணிகளை வழங்கும் விளைவினை ஏற்படுத்தும். எனவே தமிழக அரசானது மாநகராட்சியில் மற்றும் நகராட்சிகள் தொடர்பான சட்டங்களை தக்கவாறு திருத்துவதென்று முடிவு செய்துள்ளது’’ அதில் குறிப்பிடப்பட்டிருக்கிறது.


இதே போல நகராட்சி மன்றத்தில் 20க்கு குறைவான உறுப்பினர் இருக்கக் கூடாது என வகை செய்யும் சட்டத்தில் மன்ற உறுப்பினர்களின் குறைந்தபட்ச எண்ணிக்கை 15 ஆக நிர்ணயிப்பது என்று முடிவு செய்யும் சட்ட திருத்த மசோதாவும் அமைச்சரால் தாக்கல் செய்யப்பட்டது. நக்கீரன்