சென்னை அருகே உலகத் தரத்தில் புதிய நகரம்

by **இளமாறன்** Tue Aug 30, 2011 1:04 am

சென்னை:மறைமலை நகர் - திருப்போரூர் பகுதிகளுக்கிடையே உலகத் தரத்திலான புதிய நகரம் வளர, வாய்ப்புகள் அதிகமாக உள்ளன என, சட்டசபையில் அரசு தெரிவித்துள்ளது.சட்டசபையில் தாக்கல் செய்யப்பட்ட, வீட்டுவசதி மற்றும் நகர்ப்புற வளர்ச்சித் துறையின் கொள்கை விளக்கக் குறிப்பில் தெரிவிக்கப்பட்டுள்ள விவரம்:
வண்டலூர் - கேளம்பாக்கம் அருகில், ஜி.எஸ்.டி., சாலைக்கும் கிழக்குக் கடற்கரை சாலைக்கும் இடைப்பட்ட பகுதி, எந்த முழுமை திட்டமோ, நீண்டகால திட்டமோ இல்லாமல் நகர்ப்பகுதியாக வளர்ந்து வருகிறது.எதிர்காலத்தில் உலகத்தரமான புதிய நகராக வளர வாய்ப்புள்ள இப்பகுதி, முறையான திட்டமிடல் இல்லாவிட்டால் சாதாரண புறநகர்ப் பகுதியாக மாறிவிடும் அபாயம் உள்ளது.

எனவே, சென்னை பெருநகர எல்லைக்கு வெளியே, 134 வருவாய் கிராமங்களை உள்ளடக்கிய, 562 சதுர கிலோ மீட்டர் பரப்பளவுள்ள பகுதிக்கானத் திட்டத்தை, சி.எம்.டி.ஏ., தேர்வு செய்துள்ளது.இப்பகுதியில் நிலங்களை அதிக அளவில் கையகப்படுத்தாமல், நில பயன்பாடு மற்றும் வளர்ச்சி விதிகளில் மாற்றங்கள் செய்து, சீரான வளர்ச்சிக்கான திட்டம் தயாரிக்கப்படும். இதற்காக நகர்ப்புற வளர்ச்சித்துறை அமைச்சர் தலைமையில், ஒரு மேம்பாட்டு திட்டக்குழு அமைக்கப்பட்டுள்ளது.இத்திட்டத் தயாரிப்பு பணிகள் நடப்பு நிதியாண்டின் இறுதிக்குள் முடிக்கப்படும்.

தினமலர்