ஜாகீர்கான்- 18 பேருக்கு அர்ஜூனா விருது: ககன் நரங்குக்கு கேல்ரத்னா விருது; ஜனாதிபதி வழங்கினார்

புதுடெல்லி, ஆக. 29-

சிறந்த விளையாட்டு வீரர்- வீராங்கனைகளுக்கு மத்திய அரசு ஆண்டு தோறும் ராஜீவ்காந்தி கேல் ரத்னா விருது, அர்ஜூனா விருதுகளை வழங்கி வருகிறது. இந்த ஆண்டுக்கான கேல் ரத்னா, அர்ஜூனா விருதுக்கான விவரம் ஏற்கனவே அறிவிக்கப்பட்டது.

இந்த விருது வழங்கும் விழா ஜனாதிபதி மாளிகையில் இன்று நடந்தது. இந்திய விளையாட்டில் வழங்கப்படும் மிகவும் உயரிய விருதான ராஜீவ்காந்தி கேல் ரத்னா விருது துப்பாக்கி சூடும் வீரர் ககன் நரங்குக்கு வழங்கப்பட்டது. ஜனாதிபதி பிரதீபா பட்டீல் இதை வழங்கினார். அவருக்கு பதக்கத்துடன் ரூ.7 1/2 லட்சம் வழங்கப்பட்டது.

28 வயதான ககன் நங் கடந்த ஆண்டு நடந்த காமன்வெல்த்தில் 4 தங்கம் வென்று இருந்தார். ஆசிய விளையாட்டில் வெள்ளிப்பதக்கம் பெற்று இருந்தார். அடுத்த ஆண்டு நடைபெறும் லண்டன் ஒலிம்பிக் போட்டிக்கு தகுதி பெற்ற முதல் இந்திய வீரர் ககன் ஆவார்.

கடந்த ஆண்டு அவருக்கு கேல் ரத்னா விருது வழங்கப்படாததால் அதிருப்தி தெரிவித்து இருந்தார். இந்திய அணியின் வேகப்பந்து வீரர் ஜாகீர்கான் உள்பட 19 பேர் அர்ஜூனா விருதுக்கு அறிவிக்கப்பட்டனர்.

அர்ஜூனா விருதுக்கான 19 பேர் விவரம்:-

ஜாகீர்கான் (கிரிக்கெட்), ராகுல் பானர்ஜி (வில் வித்தை), பிரீஜா ஸ்ரீதரன், விகாஸ் கவுடர் (தடகளம்), ஜூவாலாகட்டா (பேட் மின்டன்), சுரன் ஜாய்சிங் (குத்துச்சண்டை), சுனில் செட்ரி (கால்பந்து), ராஜ்பால்சிங் (ஆக்கி), விர்த்வால் காடே, கரம்கர் (நீச்சல்), தேஜஸ்வினி சவாந்த் (துப்பாக்கி சுடுதல்), ஆசிஷ் குமார் (ஜிம்னாஸ்டிக்), சோம்தேவ் தேவ்வர்மன் (டென்னிஸ்), ரவீந்தர்சிங் (மல்யுத்தம்), ரவிக்குமார் (பளுதூக்குதல்), சந்தியா ராணி (ஊசூ), சஞ்சய்குமார் (கைப்பந்து), ராஜேஷ்குமார், தேஜஸ்வினிபாய் (கபடி), இதில் ஜாகீர்கான், சோம்தேவ், ஆசிஷ்குமார், விகாஸ் கவுடா ஆகியோர் பல்வேறு காரணங்களுக்காக விருது வழங்கும் விழாவில் பங்கேற்கவில்லை.

மற்றவர்கள் பங்கேற்று ஜனாதிபதியிடம் இருந்து அர்ஜூனா விருது பெற்றனர். மாலைமலர்