உலக தடகள போட்டி, முதல் தங்கப்பதக்கத்தை கென்யா வென்றது

உலக தடகள போட்டி தென்கொரியாவில் நேற்று கோலாகலமாக தொடங்கியது. இதில் முதல் தங்கப்பதக்கத்தை மராத்தான் பந்தயத்தில் கென்ய வீராங்கனை வென்றார்.

கென்யாவுக்கு முதல் தங்கம்

13-வது உலக தடகள சாம்பியன் ஷிப் போட்டி தென்கொரியாவில் உள்ள டெகு நகரில் நேற்று கண்கவர் கலைநிகழ்ச்சி மற்றும் வாணவேடிக்கைகளுடன் கோலாகலமாக தொடங்கியது. இந்த போட்டியில் 202 நாடுகளை சேர்ந்த 1945 வீரர்-வீராங்கனைகள் கலந்து கொண்டுள்ளனர். இந்தியா சார்பில் 8 வீரர்-வீராங்கனைகள் பங்கேற்றுள்ளனர்.

இதில் நேற்று நடந்த பெண்களுக்கான மராத்தான் பந்தயத்தில் கென்யா வீராங்கனை எட்னா கிப்லாகாட் 2 மணி 28 நிமிடம் 43 வினாடியில் பந்தய தூரத்தை கடந்து முதல் தங்கப்பதக்கத்தை கென்யாவுக்கு வென்று கொடுத்தார். இந்த போட்டியில் வெள்ளி மற்றும் வெண்கலப்பதக்கமும் கென்யாவுக்கே கிடைத்தது. அந்த நாட்டு வீராங்கனை பிரிஸ்கா ஜெப்டூ 2:29:00 வினாடியில் பந்தய தூரத்தை எட்டி வெள்ளிப்பதக்கமும், மற்றொரு வீராங்கனை ஷரோன் ஷெரோப் 2:29:14 வினாடியில் பந்தய தூரத்தை கடந்து வெண்கலப்பதக்கமும் பெற்றனர்.

குழந்தைகளுக்கு அர்ப்பணிப்பு

முதல் தங்கப்பதக்கம் வென்ற 31 வயதான எட்னா கிப்லாகாட் கென்யா போலீசில் வேலை பார்க்கிறார். வெற்றிக்கு பின்னர் கிப்லாகாட் கூறுகையில், `இது தான் நான் பங்கேற்ற முதல் உலக தடகள சாம்பியன் ஷிப் போட்டியாகும். இதில் வெற்றி கண்டது மிகுந்த மகிழ்ச்சி அளிக்கிறது. இந்த போட்டிக்காக நான் சிறப்பு திட்டம் எதுவும் கடைபிடிக்கவில்லை. மணிக்கு 32 கிலோ மீட்டர் வேகத்தில் ஓட வேண்டும் என்ற முடிவுடன் செயல்பட்டேன். கடைசி கட்ட தண்ணீர் நிலையத்தில் தண்ணீர் குடிக்கும் போது என் மீது சக வீராங்கனை மோதியதில் கீழே விழுந்தேன். இதனால் ஓட்ட திறன் பாதிக்குமோ என்று பயந்தேன். அதனால் எந்தவித பாதிப்பும் ஏற்படவில்லை. இந்த வெற்றியை எனது 2 குழந்தைகளுக்கும் அர்ப்பணிக்கிறேன். இந்த வெற்றியை ஷாப்பிங் சென்று கொண்டாடுவேன்' என்றார்.

இதேபோல் பெண்களுக்கான 10 ஆயிரம் மீட்டர் ஓட்டத்திலும் கென்யாவே முழுமையாக ஆதிக்கம் செலுத்தியது. கென்ய வீராங்கனை விவியன் செரியோட் 30:48.98 வினாடியில் பந்தய தூரத்தை கடந்து தங்கப்பதக்கம் வென்றார். சக நாட்டவர்களான சாலி கிப்யகோ வெள்ளிப்பதக்கமும், லினட் மாசியா வெண்கலப்பதக்கமும் பெற்றனர்.

அதிர்ச்சி தோல்விகள்

ஆண்களுக்கான போல்வால்ட் போட்டியில் முன்னாள் உலக மற்றும் ஒலிம்பிக் சாம்பியனான ஆஸ்திரேலிய வீரர் ஸ்டீவ் ஹூகெர் தகுதி சுற்றுடன் வெளியேறினார். சர்வதேச தடகள சம்மேளனம் நிர்ணயித்துள்ள 5.50 மீட்டர் உயரத்தை அவர் 3 முறை முயற்சித்தும் தோல்வி கண்டார். ஸ்டீவ் காயத்தில் இருந்து மீண்டு ஜுலை மாதம் தான் களம் திரும்பினார் என்பது குறிப்பிடத்தக்கது.

இதேபோல் 400 மீட்டர் ஓட்டத்தில் இங்கிலாந்து வீராங்கனை கிறிஸ்டின் ஒகுரோகு தகுதி சுற்றுடன் வெளியேறினார். தகுதி சுற்றில் அவர் தவறான தொடக்கம் கண்டதால் வெளியேற்றப்பட்டார். 27 வயதான கிறிஸ்டின், 2007-ம் ஆண்டு உலக சாம்பியன் ஷிப் போட்டி, பீஜிங் ஒலிம்பிக் போட்டி ஆகியவற்றில் 400 மீட்டர் ஓட்டத்தில் தங்கப்பதக்கம் வென்றவர் ஆவார்.

தினதந்தி