லோக்பால் மசோதா தீர்மானம் பார்லி.,யில் தாக்கல் : பாதி வெற்றி என ஹசாரே அறிவிப்பு

புதுடில்லி : ஊழலற்ற நிலையை உருவாக்குவதற்காக ஜன் லோக்பால் மசோதாவை வலியுறுத்தி காந்தியவாதி அன்னா ஹசாரே மேற்கொண்டிருந்த காலவரையற்ற உண்ணாவிரதப் போராட்டம் முடிவுக்கு வந்துள்ளது. இதையடுத்து, அவர் இன்று காலை 10 மணிக்கு தனது உண்ணாவிரதப் போராட்டத்தை முடித்துக் கொள்வார் என்று எதிர்பார்கப்படுகிறது.

மாநிலங்களில் லோக் ஆயுக்தா வசதி, பொதுமக்களுக்கான குறை தீர்ப்பு மற்றும் அனைத்து நிலையில் உள்ள அதிகாரிகளையும் லோக்பால் வரம்பிற்குள் கொண்டு வரும் சட்டம் உள்ளிட்ட 3 கோரிக்கைகளை அன்னா குழு அரசு முன் வைத்தது. இந்த கோரிக்கைகளை அரசு ஏற்றுக் கொண்டதன் பேரில், இன்று லோக்பால் மசோதா குறித்த அறிக்கை மீதான விவாதம் பார்லிமென்டில் நடைபெறும் என்று அரசு சார்பில் தெரிவிக்கப்பட்டது.

பார்லிமென்டில், இதுகுறித்த விவாதம் துவங்கினால், ஹசாரே உண்ணாவிரதப் போராட்டத்தை முடித்துக் கொள்வார் என்று ஹசாரே குழு சார்பில் தெரிவிக்கப்பட்டது.

மசோதா தீர்மானம் தாக்கல் : இந்நிலையில்,நேற்று காலை, மத்திய அமைச்சர் பிரணாப் முகர்ஜி, மசோதா குறித்த அறிக்கை மீதான விவாதத்தை துவக்கி வைத்தார். பின் அரசியல் கட்சிகள் இதுகுறித்து விவாதித்தனர். இந்நிலையில், குரல் ஓட்டெடுப்புக்கும் அரசு ஒப்புதல் அளித்தது. விவாதத்தில், அனைத்துக் கட்சி தலைவர்கள் உரையாற்றிய பின், பிரணாப் அதற்கு பதிலளிக்கும் வகையில், மசோதா குறித்த தீர்மானத்தை தாக்கல் செய்தார்.

பிரதமர் கடிதம் : ஹசாரேவின் 3 கோரிக்கைகளை அரசு ஏற்று பார்லிமெண்டில் விவாதம் ந‌டத்த அரசு சம்மதம் தெரிவித்தவுடன், ஹசாரேவுக்கு பிரதமர் கடிதம் எழுதி அனுப்பி வைத்தார். அதல், அவர் தங்கள் மசோதா குறித்து விவாதம் நடத்த அரசு ஒப்புதல் அளித்துள்ளது. எனவே, தாங்கள் உண்ணாவிரதத்தை கைவிடுமாறு கேட்டுக் கொண்டார்.

ஹசாரே - விலாஸ்ராவ் சந்திப்பு : பார்லிமென்டில், லோக்பால் மசோதா குறித்த குரல் ஓட்டெடுப்பு நடத்தப்பட உள்ளதன் தீர்மான நகலை, மத்திய அமைச்சர் விலாஸ்ராவ் தேஷ்முக், அன்னா ஹசாரேவிடம் வழங்கினார்.

ஹசாரேவுக்கு குர்ஷித் வாழ் த்து: புதுடில்லி : லோக்பால் மசோதா குறித்த தீர்மானம் பார்லிமென்டில் தாக்கல் செய்யப்பட்டதன் மூலம் தனது போராட்டத்தில் ஹசாரே வெற்றி பெற்றுள்ளார். இதற்கு தனது வாழ்த்துக்களை அவருக்கு தெரிவித்துக் கொள்வதாக மத்திய சட்டத்துறை அமைச்சர் சல்மான் குர்ஷித் தெரிவித்துள்ளார். இதன்மூலம், நாட்டின் வரலாற்றில் புதிய அத்தியாயம் உருவாக்கப்பட்டுள்ளதாக அவர் தெரிவித்தார்.

மக்கள் சக்தி வென்றது : கிரண் பேடி : புதுடில்லி : பார்லிமென்டில், லோக்பால் மசோதா குறித்த அறித்த தீர்மானம் தாக்கல் செய்ய்ப்பட்டுள்ளதன் மூலம் மக்கள் சக்தி வென்றுள்ளதாக அன்னா குழுவில் இடம்பெற்றுள்ள கிரண் பேடி தெரிவித்துள்ளார். மசோதா மீதான தீர்மானம் தாக்கல் செய்யப்பட்டுள்ளதன் மூலம் தங்களது போராட்டம் வெற்றி பெற்றுள்ளதாக அவர் மேலும் தெரிவித்துள்ளார்.

போராட்டம் பாதி வெற்றி : அன்னா ஹசாரே பேட்டி : ""எங்களது போராட்டம் பாதிதான் வெற்றி பெற்றிருக்கிறது. இருந்தாலும், மத்திய அரசின் முடிவை ஏற்று, உண்ணாவிரதத்தை நாளை (இன்று) காலை வாபஸ் பெறுகிறேன்'' என, அன்னா ஹசாரே கூறினார். பலமான லோக்பால் மசோதா அவசியம் என வலியுறுத்தி, கடந்த 12 நாட்களாக அன்னா ஹசாரே உண்ணாவிரதம் மேற்கொண்டுள்ளார். இதையடுத்து, பலமான லோக்பால் மசோதா தொடர்பான தீர்மானம், பார்லிமென்டின் இரு சபைகளிலும், நேற்று நிறைவேற்றப்பட்டு, அது தொடர்பான பிரதமர் மன்மோகன் சிங்கின் கடிதம், மத்திய அமைச்சர் விலாஸ்ராவ் தேஷ்முக் மூலம், அன்னா ஹசாரேக்கு அனுப்பி வைக்கப்பட்டது. ஹசாரேயைச் சந்தித்த அவர், பிரதமர் மன்மோகன் சிங் கடிதத்தை அளித்து, பலமான லோக்பால் மசோதாவுக்கு ஆதரவாக, தீர்மானம் நிறைவேற்றப்பட்டிருப்பது குறித்து தெரிவித்தார். இதையடுத்து, நாளை ( இன்று) காலை 10 மணிக்கு உண்ணாவிரதத்தை முடித்துக் கொள்வதாக, ஹசாரே கூறினார். அவர் கூறுகையில், ""இந்தப் போராட்டத்தில், நாம் பாதிதான் வெற்றி பெற்றிருக்கிறோம். விவாதத்தில் பங்கெடுத்த, அனைத்து எம்.பி.,க்களுக்கும் நன்றி. இந்த விவகாரத்தில், உறுதியான போராட்டம் நடத்தி, அரசைச் சம்மதிக்க வைத்ததற்காக, பொதுமக்கள் அனைவருக்கும் நன்றி'' என்றார்.
போராட்டத்தை முடித்துக் கொள்வதாக, அன்னா ஹசாரே கூறியதும், ராம்லீலா மைதானத்தில் கூடியிருந்த, ஆயிரக்கணக்கான ஆதரவாளர்கள் பெருங்கூச்சலிட்டு, ஆரவாரமாக தங்கள் மகிழ்ச்சியை வெளிப்படுத்தினர்; பட்டாசுகளும் வெடித்தனர். மேலும், இந்தப் போராட்டம் வெற்றிபெற உறுதுணையாக இருந்த, மத்திய அமைச்சர் விலாஸ்ராவ் தேஷ்முக்குக்கு நன்றி தெரிவித்தும், கூச்சலிட்டனர். தினமலர்