மாண்டவர் மீண்டார்! மருத்துவமனையில் அனுமதி

by kitcha Fri Aug 26, 2011 4:03 pm

தர்மபுரி: : மரணமடைந்தாக நினைத்து வாலிபர் ஒருவரை சவக்குழியில் இறக்கியபோது அவர் உயிருடன் இருப்பது தெரிய வந்ததும் உறவினர்கள் அதிர்சியடைந்தனர். மாண்டவர் மீண்ட சம்பவம் அப்பகுதியில் பெரும் பரபரப்பை ஏற்படுத்தியுள்ளது.

தர்மபுரி மாவட்டம் நெருப்பூர் அருகே குருக்கலையனு£ரை சேர்ந்தவர் மாது(33). இவர், ஆந்திர மாநிலம் கொட்டாளம் என்னுமிடத்தில் உள்ள தனியார் கல் குவாரியில் பணியாற்றி வந்தார். இந்நிலையில் வேலையின் போது பாறையிலிருந்து தவறி விழுந்துள்ளார். படுகாயம் அடைந்த அவரை மீட்டு வந்து வேலூரில் உள்ள தனியார் மருத்துவமனையில் சேர்த்துள்ளனர். சில மணி நேர சிகிச்சைக்கு பின் மாது இறந்து விட்டதாக மருத்துவர்கள் தெரிவித்துள்ளனர். உடனே மாதுவின் மனைவி மற்றும் உறவினர்களுக்கு தகவல் தெரிவிக்கப்பட்டது.

இதையடுத்து அங்கு விரைந்து வந்த உறவினர்கள் இறுதிச்சடங்குகள் செய்வதற்காக மாது உடலை வாகனத்தில் ஏற்றி சொந்த ஊருக்கு கொண்டு வந்தனர். அங்கு மனைவி மற்றும் உறவினர்கள் உடலை கட்டிப்பிடித்து கதறி அழுதனர். இறுதி காரியங்கள் முடிந்ததும், உடலை புதைப்பதற்காக சுடுகாட்டுக்கு ஊர்வலமாக எடுத்துச் சென்றனர். சுடுகாட்டில் தோண்டப்பட்டிருந்த குழியில் உடலை இறக்கினர். உறவினர்கள் உடல் மீது மண் தள்ளினர்.

அப்போது திடீரென மாதுவின் உடலில் லேசான அசைவு ஏற்பட்டுள்ளது. இதனைக் கண்ட உறவினர்கள் அதிர்ச்சி அடைந்தனர். குழிக்குள் இறக்கப்பட்ட மாதுவை வெளியில் எடுத்து உடனடியாக தர்மபுரி அரசு மருத்துவமனைக்கு கொண்டு சென்றனர். அங்கு மாதுவுக்கு தீவிர சிகிச்சை அளிக்கப்பட்டு வருகிறது. இறந்ததாக கருதி புதைக்கும் போது வாலிபர் உயிர் பிழைத்த சம்பவம் அப்பகுதியில் மகிழ்ச்சியையும், பரபரப்பையும் ஏற்படுத்தியுள்ளது.

இந்நேரம்