சென்னையில் ஒரே நாளில் 16 செ.மீ. மழை பெய்தது

சென்னையில் நேற்று முன்தினம் ஒரே நாளில் 16 செ.மீ. மழை பெய்தது. தமிழ்நாடு மற்றும் புதுச்சேரியில் இன்றும் (வெள்ளிக்கிழமை) இடியுடன் மழை பெய்யும் என்று வானிலை மையம் அறிவித்துள்ளது.

16 செ.மீ. மழை

தமிழ்நாட்டில் தென்மேற்கு பருவமழைக்காலம் நடைபெற்று வருகிறது. சென்னையிலும் அதன் சுற்றுப்புறங்களிலும் நேற்று முன்தினம் மாலையிலும் இரவிலும் பலத்த மழை பெய்தது.

சென்னை டி.ஜி.பி. அலுவலக பகுதியில் 16 செ.மீ. மழை பதிவாகி இருந்தது. நுங்கம்பாக்கத்தில் 15 செ.மீ.மழை பெய்திருந்தது. எல்லாவற்றுக்கும் மேலாக மீனம்பாக்கத்தில் 16.3 செ.மீ.மழை பதிவாகி இருந்தது.

இப்படி ஒரே நாளில் திடீர் என்று இப்படி மழை பெய்துள்ளதே காரணம் என்று சென்னை வானிலை ஆராய்ச்சி மைய அதிகாரியிடம் கேட்டதற்கு வங்கக்கடலில் ஏற்பட்ட வெப்பச்சலனம் காரணமாகத்தான் இந்த மழைபெய்துள்ளது வேறு காரணம் எதுவும் இல்லை என்றார். (வெப்பச்சலனம் என்பது சூரிய வெப்பத்தால் ஒரு இடத்தில் உள்ள நீர் ஆவியாகி அந்த இடத்திலேயே மழையாக பெய்வதாகும். இதை வெப்பந்தூக்கி மழை என்று அழைப்பார்கள்.)

இப்படி குறுகிய நேரத்தில் அதிக மழைபெய்ததாலும் சரியான வடிகால் வசதி இல்லாததாலும் சென்னை நகரில் பல இடங்களில் மழை நீர் முழங்கால் அளவுக்கு தேங்கி கிடந்தது.

மழை நீரால் போக்குவரத்து பாதிப்பு

சென்னை கார்ப்பரேஷன் அலுவலகத்திற்கும் சென்டிரல் ரெயில்நிலையத்திற்கும் இடைப்பட்ட பகுதியில் மழைநீர் குளம்போல தேங்கி கிடந்தது. அதனால் கோயம்பேடு மார்க்கமாக செல்லும் வாகனங்கள் நிறுத்தும் இடத்திலும் 17 டி, மற்றும் வில்லிவாக்கம் செல்லும் 20-ம் நம்பர் கொண்ட பஸ்கள் நிற்கும் நிறுத்தத்திலும் பயணிகள் யாரும் நிற்கமுடியாதபடி தண்ணீர் இருந்தது.

பஸ்கள் ஊர்ந்தபடி சென்றன. அதனால் போக்குவரத்து நெரிசலும் பாதிப்பும் ஏற்பட்டது.

இதேபோல அயனாவரம், கொளத்தூர், பெரம்பூர், ஜமாலியா, ஓட்டேரி, பட்டாளம், அண்ணாநகர் ஆகிய பகுதிகளிலும் மழை நீர் தேங்கி கிடந்ததால் போக்குவரத்து நெரிசல் ஏற்பட்டது. கோயம்பேடு 100 அடி ரோடு, மதுரவாயல்ரோடு, அடையாறு, திருவான்மிïர் உள்ளிட்ட பல்வேறு முக்கிய இடங்களில் மழை நீர் தேங்கி கிடந்ததன் காரணமாக வாகன போக்குவரத்தில் இடைïறு ஏற்பட்டது. 10 நிமிடத்தில் கடக்கவேண்டிய இடத்தை 30 நிமிடத்தில் கடக்க முடிந்தது. இதனால் பஸ் பயணிகளும், கார்களில் சென்றவர்களும், இரு சக்கர வாகனங்களில் சென்றவர்களும் பாதிக்கப்பட்டனர்.

தண்ணீர் இறைத்தல்

பல இடங்களில் சாலையில் உள்ள தண்ணீர், மோட்டார் வைத்து இறைத்து வெளியேற்றப்பட்டது.

அதனால் மதியம் சற்று போக்குவரத்து சகஜநிலைக்கு திரும்பியது.

இன்றைய வானிலை குறித்து சென்னை வானிலைமையம் அறிக்கையில் கூறியிருப்பதாவது:-

இன்று மழை பெய்யும்

தென்மேற்கு பருவமழை ஆந்திராவில் வலுவடைந்துள்ளது. அடுத்த 24 மணி நேரத்திற்கு தமிழ்நாடு மற்றும் புதுச்சேரியில் ஆங்காங்கே மழை அல்லது இடியுடன் மழை பெய்யும். சென்னையில் மாலை அல்லது இரவில் சில இடங்களில் மழை அல்லது இடியுடன் கூடிய மழைபெய்யும்.

இவ்வாறு அந்த அறிக்கையில் உள்ளது.

தினதந்தி