“38 தங்க செயின்களை இழந்தாயே தமிழா!” -கருணாநிதி துயரம்!

Viruvirupu, Friday 26 August 2011, 03:15 GMT

சென்னை, இந்தியா: “நான் பலமுறை சொல்லியும் தமிழர்கள் கேட்கவில்லை; அதனால், இன்று அனுபவிக்கின்றனர். 38 செயின்களை பறிகொடுத்துவிட்டு திண்டாடுகிறார்கள்” என்று அங்கலாய்த்திருக்கிறார், முன்னாள் முதல்வர் கருணாநிதி. வடசென்னையில் வைத்து, தமிழர்களின் கையறு நிலை பற்றிக் கருத்து தெரிவித்துள்ள கருணாநிதி, “இந்தத் தமிழர்கள் நான் சொல்வதைக் கேட்காவிட்டாலும் பரவாயில்லை, அவர்களுக்காக தொடர்ந்து போராடுவேன்” என்றும் கூறியுள்ளார்.

முன்னாள் முதல்வர் எதற்காக வடகென்னைப் பக்கமாகச் சென்றார்? வடசென்னை மாவட்ட தி.மு.க. சார்பில், ‘சட்டசபையில் ஜனநாயகம் படும் பாடு’ என்ற தலைப்பில், தங்கச் சாலையில் ஒரு பொதுக்கூட்டம் நடந்தது. புதிய ஆட்சியில் சட்டசபைக்குச் செல்லாத, இனியும் சட்டசபைக்குச் செல்லும் திட்டம் ஏதுமே இல்லாத கருணாநிதி, இந்தக் கூட்டத்தில் கலந்து கொண்டு, ‘சட்டசபையில் ஜனநாயகம் படும் பாடு’ பற்றி உரையாற்றினார்.

இம்முறை தான் பிறந்த தொகுதியில் ஜெயித்து எம்.எல்.ஏ. ஆனவர் கருணாநிதி. அத்தொகுதி மக்கள், தமது பிரதிநிதியாக சட்டசபைக்கு செல்வதற்கே இவருக்கு வாக்களித்து அனுப்பியிருந்தனர்.

கருணாநிதி பேசியபோது, “ஜெயலலிதா ஆட்சிக்கு வந்ததும், ‘வன்முறைக்கு இனி இடமில்லை; கொலை, கொள்ளையில் ஈடுபட்டோர் ஆந்திராவுக்கு தப்பிவிட்டனர்’ என ஜெயலலிதா கூறினார். அவரது 100 நாள் ஆட்சியில், தமிழகத்தில், 86 கொலைகள், 110 கொள்ளைகள், 38 செயின் பறிப்புகள், 13 வழிப்பறிகள் நடந்துள்ளன. இவையும் சாதனை தான். புதிய தலைமைச் செயலகம் எதற்கும் உதவாது என்றவர், தற்போது தலைசிறந்த மருத்துவமனை வரும் என தீர்மானம் போடுகிறார்.

நான் தமிழர்களுக்கு பல முறை சொல்லியும், அவர்கள் காதில் போட்டுக் கொள்ளவில்லை; அதனால் இன்று அனுபவிக்கின்றனர். தமிழுக்கு மரியாதை கொடுக்க மாட்டோம் என உறுதியாக உள்ளனர். சமச்சீர் பாடப் புத்தகத்தில், செம்மொழி என்ற வார்த்தையை அழித்துள்ளனர். புத்தகத்தில் உள்ள வாசகத்தை அழிக்கலாமே தவிர, தமிழர்களின் இதயத்தில் உள்ள வார்த்தைகளை அழிக்க முடியாது. தமிழ் வாழ, தமிழர் வாழ போராடுவோம். இளைஞர்கள் இருக்கும்வரை எனக்கு கவலை இல்லை” என்றார்.

38 செயின் பறிப்புகள், 13 வழிப்பறிகள்.. என்னங்க ஆட்சி இது தலைவரே! நம்ம ஆட்சியில் ‘எக்ஸ்பென்ஸிவ்’ நில அபகரிப்புகள் அல்லவா ஜாஸ்தி!

அடுத்தவர்களை குறை சொல்லும் முன்பு நம்முடைய முதுகையும் கொஞ்சம் பார்க்கணும்

இரண்டு கழகங்கள் ஊட்டி வளர்த்த செயல்கள் !