எல்லை தெரியாமல் ரோந்து சென்ற பொள்ளாச்சி போலீசுக்கு சரமாரி உதை

தமிழக எல்லையில் உள்ள கேரள பகுதியில் ரோந்து சென்ற பொள்ளாச்சி போலீசை கேரள மக்கள் சரமாரியாக அடித்து உதைத்ததால் பரபரப்பு நிலவுகிறது.
கோவை மாவட்டம், பொள்ளாச்சி தாலுகா போலீஸ் ஸ்டேஷனுக்குட்பட்ட கோபாலபுரம், கேரள எல்லையில் உள்ளது. இங்குள்ள பண்ணை வீடுகளில் சீட்டாட்டம் நடைபெறுவதாக பொள்ளாச்சி டிஎஸ்பி பாலாஜிக்கு தகவல் வந்தது.

அங்கு தாலுகா போலீசுக்கு தெரியாமல் அதிரடி சோதனை நடத்த திட்டமிட்ட டிஎஸ்பி தமிழ்நாடு சிறப்பு போலீசார் 4 பேருடன் நேற்றுமுன்தினம் இரவு 10 மணியளவில் கேரள எல்லையான தாவளம் பகுதியை கோபாலபுரம் பகுதி என நினைத்து சென்றனர். அங்குள்ள திருமண மண்டபத்தில் கும்பல் கும்பலாக ஆட்கள் நடமாடினர். ரோட்டில் ஜீப்பில் டிஎஸ்பி அமர்ந்து கொண்டார். 4 போலீசாரும் மப்டியில் மண்டபத்தை நோக்கி சென்றனர். எதிரே வந்த சிலர் சிறப்பு போலீசாரை சந்தேகமடைந்து விசாரித்தனர்.

தாங்கள் கூலி வேலைக்கு வந்துள்ளதாகவும் பண்ணை ஒன்றுக்கு செல்வதாக தெரிவித்தனர். அப்போது மண்டபத்தில் இருந்த கும்பல் சிறப்பு போலீசாரை கொள்ளை கும்பல் என்று சந்தேகப்பட்டு, சரமாரியாக தாக்கினர். தூரத்தில் இருந்து இதை பார்த்த டிஎஸ்பி அதிர்ச்சியடைந்து விரைந்து வந்து போலீசாரை மீட்டார். நாங்கள் ரோந்துக்கு வந்த போலீசார் என்று தெரிவித்தார்.

இது கேரளா கொழிஞ்சாம்பாறைக்கு உட்பட்ட பகுதி, இங்கு தமிழக போலீசார் வந்தது ஏன் என்று கூறி, அவர்கள் மீண்டும் தாக்க தயாராகினர். அதிர்ச்சியடைந்த டிஎஸ்பி கொழிஞ்சாம்பாறை போலீசாரை தொடர்பு கொண்டு விஷயத்தை தெரிவித்தனர். அவர்கள் விரைந்து வந்து, பொள்ளாச்சி டிஎஸ்பி மற்றும் சிறப்பு போலீசாரை மீட்டனர். போலீசை மக்கள் அடித்து உதைத்ததால் அப்பகுதியில் பரபரப்பு நிலவுகிறது.

- தினகரன்