முதலிடம் தான் இலக்கு: சச்சின்

புதுடில்லி: ஒரு நாள் போட்டிக்கான ரேங்கிங் பட்டியலில் இந்திய அணிக்கு முதலிடம் பெற்று தருவதே இலக்கு என சச்சின் தெரிவித்துள்ளார்.
கடந்த 1989, நவ.,15ம் தேதி இந்திய அணியில் அறிமுகமானார் சச்சின். தொடர்ந்து அசத்தல் ஆட்டத்தை வெளிப்படுத்திய இவர், மாஸ்டர் பேட்ஸ்மேனாக உருவெடுத்தார். டெஸ்ட், ஒரு நாள் போட்டிகளில் அதிக ரன், அதிக சதம் எடுத்து சாதித்தார். இன்னும் இரண்டு மாதங்களில் கிரிக்கெட்டில் காலடி எடுத்து வைத்ததன் 20 ஆண்டுகளை பூர்த்தி செய்ய உள்ளார். இந்த தருணத்தில் தனது ஒரே இலக்கு ஒரு நாள் போட்டிகளில் இந்திய அணிக்கு முதலிடத்தை பெற்று தருவது தான் என்கிறார். அதற்கான திறமை நமது அணியிடம் இருப்பதாக நம்பிக்கை தெரிவித்துள்ளார்.
இதுகுறித்து சச்சின் கூறியது:
தென் ஆப்ரிக்காவில் நடக்க உள்ள சாம்பியன்ஸ் டிராபி தொடரில் பங்கேற்க உள்ள எங்களிடம், ஒட்டுமொத்த தேசமுமே என்ன எதிர்பார்க்கிறது என தெரியும். எங்கள் அணியின் லட்சியமும் வெற்றி தான். இங்கு இந்திய அணி சிறப்பாக செயல்படும். தற்போது, ஒரு நாள் அணிகளுக்கான ரேங்கிங் பட்டியலில் முன்னும் பின்னும் ஊசலாடிக் கொண்டுள்ள, முதலிடத்தை இந்திய அணி பிடிக்க வேண்டும் என்பதில் ஆர்வமாக உள்ளேன். இது கட்டாயம் நடக்கும். அதற்கான திறமை நமக்கு உண்டு.
கடந்த சில ஆண்டுகளாக நமது அணி அசத்தலாக செயல்பட்டு வருகிறது. இந்நிலையில் முதலிடத்தை பெறுவதற்காக நாங்கள் போராடுவோம்.
அடுத்து வரஇருக்கும் தொடர்கள் நமக்கு சவாலானவை. பொதுவாக அதிக டெஸ்ட் போட்டிகள் விளையாடுவதை நான் வரவேற்கிறேன். ஆனால் இந்த சீசனில் மூன்று டெஸ்ட் போட்டிகளில் மட்டுமே இந்திய அணி பங்கேற்க உள்ளது.
இவ்வாறு சச்சின் தெரிவித்தார்.