TN-04 T 6024

by ஷீ-நிசி Wed 24 Aug 2011 - 1:29

காலை மணி 8.30, குழந்தைக்கு பள்ளிக்கு நேரமாகிவிட்டதே என்று வேகமாக படியில் இறங்கி கீழே இறங்கியதும் ஒரு கணம் அப்படியே நின்றுவிட்டேன். இங்குதானே நிறுத்தியிருந்தேன் பைக்கை.. எங்கு போய்விட்டது என்று யோசித்துக்கொண்டே அருகே சென்று வேறு எங்காவது நிறுத்தியிருந்தேனா என்று பார்த்தேன். திங்கட்கிழமை வாரத்தின் முதல் நாளே இப்படி டென்ஷனா ஆரம்பிக்குதே என்று நினைத்தபடி அருகே இருந்த எங்கள் வீட்டு ஓனரின் கார் டிரைவரிடம் கேட்டேன். இங்கேதானே இருக்கும் என்று அவரும் பார்த்துவிட்டு மேலே தலைவர்கிட்ட சொல்லுங்கன்னு சொன்னார்.. தலைவர் தான் வீட்டு ஓனர். தலைவர் கட்சியில் கொஞ்சம் செல்வாக்கானவர். சரி அவரை போய் பார்த்து சொல்லலாம் என்று போனால் கதவு சாத்தியிருந்தது. நீண்ட நேரம் கதவை தட்டி காலிங் பெல்லை அழுத்தினால் உள்ளிருந்து அவரின் மனைவி எட்டி பார்த்து சங்கதிகளை கேட்டுக்கொண்டு அண்ணன் தூங்குகிறார். எழுந்ததும் சொல்கிறேன்னு சொல்லி அனுப்பிட்டாங்க... கொஞ்ச நேரம் பொறுத்து அவர் உதவியாளர் வந்து ஆஃபீஸ் ரூம் போய் பாருங்கன்னு தகவல் சொன்னார். ஆபீஸ் ரூம் வீட்டுக்கு அருகிலேயே இருக்கும். உள்ளே நுழைந்து சிறிது நேரம் காத்திருந்தபின் அவரை சந்தித்தேன். உட்கார சொன்னவர் என்ன ஆச்சுன்னு கேட்டார்.. வண்டி காணவில்லைன்னு... ஆரம்பிக்கும்போதே அவருடைய விசிட்டிங் கார்டை கொடுத்து ஸ்டேஷனுக்கு போங்க... ஃபோன் பன்றேன். கம்ப்ளெயின்ட் கொடுங்க என்று சொல்லி அனுப்பினார். வண்டி இல்லை. ஸ்டேஷன் தூரம்... வண்டி இல்லாமையின் வருத்தம் அசைவாட ஆரம்பித்தது. பேருந்துக்காக காத்திருந்து பின்னர் ஸ்டேஷனை அடைந்தேன். அதற்குள் என் மனைவி போன் செய்து தனியா போகாதீங்க உங்க நண்பர் யாரையாவது அழைச்சிட்டு போங்கன்னு சொன்னாள். ஸ்டேஷனில் இருந்து 1 கி,மீ தூரத்தில்தான் என் அலுவலகம். சரி என்று நண்பனுக்கு போன் செய்து வர சொன்னேன். கொஞ்ச நேரத்தில் நண்பன் வந்தான். ஸ்டேஷனில் புகார் கொடுப்பதற்கு முன்பாக அலுவலகத்தின் செக்யூரிட்டி ஹெட் ரிட்டையர்டு டி.எஸ்.பி. அவரை சந்தித்துவிட்டு வரலாம் என்று முடிவு செய்து நண்பனோடு அலுவலகம் சென்றேன். அவரை சந்தித்து தகவல்கள் பரிமாறியபின் அவர் அங்கிருந்து ஸ்டேஷனுக்கு போன் செய்து இன்னார் வருவார். அவரிடம் புகாரை பெற்று அவருக்கு உதவுங்கள் என்று சொன்னார். ஒருவரின் பெயரை சொல்லி அவரை போய் பாருங்கள் என்றார். நன்றி தெரிவித்துவிட்டு பிறகு நண்பனும் நானும் அவ்வளவாய் பரிச்சயமில்லாத ஸ்டேஷனுக்குள் நுழைந்து அங்கிருந்த அந்த நண்பரிடம் அறிமுகம் செய்துகொண்டோம். பின்னர் அவர் சப்-இன்ஸ்பெக்டரிடம் அழைத்து சென்றார். அவரிடம் தகவல் சொன்னோம். அவர் தகவல்களை கேட்டு இன்ஸ்யூரன்ஸ் உள்ளதா என்று கேட்டார். இல்ல சார் நடுவுல் பிரேக் ஆகிடுச்சி இரண்டு வருஷம். பிறகு இன்ஸ்யூரன்ஸ் போடலாம்னு விசாரிச்சப்போ பிரேக் ஆனதால் 3வது பார்ட்டி இன்ஸ்யூரன்ஸ்தான் போட முடியும்னு சொன்னாங்க... ஏதாவது விபத்து ஏற்பட்டால் எதிர் பார்ட்டிக்கு மட்டும்தான் விபத்து காப்பீடு கவர் ஆகும், வண்டி திருடு போனாலோ, சேதம் ஆனாலோ இழப்பீடு கேட்க முடியாதுன்னு சொன்னதால நான் போடலைன்னு சொன்னேன்.

இன்ஸ்யூரன்ஸ் இல்லைன்னா ரொம்ப கஷ்டம்னு சொன்னார். அவர்கிட்ட புகார் வாங்கிட்டு C.S.R போட்டு கொடுங்க அப்படின்னு சொன்னார். நான் எதுவும் சொல்லாமல் அமைதியாக தலையை மட்டும் அசைத்துக்கொண்டேன்.

பின்னர் சிறிது நேரம் காத்திருந்தபின் C.S.R காப்பி சைன் செய்துவிட்டு வெளியில் வந்தபோது அலுவலக நண்பர் ஒருவர் ஃபோனில் வந்தார். என்ன ஆச்சு என்றார். இதுபோல நடந்தது என்றேன். சரி அருகிலிருக்கும் சைக்கிள் ஸ்டேண்டுகளில் உள்ளே போய் பார்த்துவிட்டு வா என்றார். இதுவும் மனதில் சரியென்றே பட்டது. சரி என்று நண்பனை அழைத்துக்கொண்டு 3 சைக்கிள் ஸ்டாண்டையும் அலசிவிட்டு வெளியில் வந்தோம் பலன் இல்லை. 3 உரிமையாளர்களிடமும் வண்டி எண் மொபைல் எண் ஆகியவற்றை கொடுத்துவிட்டு அலுவலகம் வந்தோம்.. சென்னை நண்பர்களுக்கு தகவல் தெரிவித்து வண்டி எண் கொடுத்து புதுப்பேட்டை பக்கம் பார்க்க சொல்லியிருக்கேன். எல்லாம் கடவுளின் செயல் என்று நினைத்து அமைதியாக இருக்கிறேன்.

நீங்களும் உங்கள் கண்ணில் சிக்கினால் தகவல் தெரிவியுங்கள் நண்பர்களே.. புது வண்டி உடனடியாக வாங்கும் அளவிற்கு பொருளாதாரம் இடம் கொடுக்கவில்லை.

வண்டி எண் : TN-04 T 6024
மாடல் : TVS VICTOR GLX 125
நிறம் : சிவப்பு மற்றும் வெள்ளை

TN-04 T 6024 TN-04T60241