வெக்கையாகிவிடும் வீடு.

**rameshnaga** · **rameshnaga** Sat Aug 20, 2011 9:58 am

ஒரு வேலை தேடி அலையும் நாட்களில்
வெக்கையாகி விடுகிறது வீடு.
எனது அறையின் சுவரெங்கும் கேலியாய்
எதிரொலிக்கிறது-
நான் கண் மூடிப் படித்த கம்பனின் வரிகளும்..,
"படிச்சு கலெக்டராகி என்னத்த கிழிக்கப் போறே?--
வாழ்த்துக்களும்.
நாய் வாய் தேங்காயென உருளுகிறேன்
எல்லோர் வாயிலும்.
தப்பிக்க இயலாத ஒரு எலியென-
தவிப்புறுகிறது எனது ஒவ்வொரு கணமும் ...
அதன் நீட்சியும்.
வைக்கோல் கன்றினை நக்கித்
தாபம் தீரும் பசுவென-
வெறும் கனவுகளை நக்கிக் கழிகிறது காலம்.
தன்னை ஒருபோதும் எதிரொலிக்காத -
நிலைக்கண்ணாடியின் முன் நின்று
கணன்று....அணையத் தெரியாத நெருப்புடன்
அலைகிறது எனது உடல்
சில எல்லைகளுக்கு...இடையில்