புதிய தலைமைச் செயலக கட்டடத்தை மருத்துவமனையாகப் பயன்படுத்துவதில் தவறில்லை: கருணாநிதி

புதிய தலைமைச் செயலகக் கட்டடத்தை மருத்துவமனையாகப் பயன்படுத்துவதில் தவறில்லை என்று முன்னாள் முதல்வர் கருணாநிதி கூறினார்.

திமுக மாணவர் அணி மற்றும் இளைஞர் அணி சார்பில் சென்னை மயிலாப்பூரில் சமச்சீர் கல்வி வெற்றி

விழா பொதுக்கூட்டம் வெள்ளிக்கிழமை நடைபெற்றது.

இதில் அவர் பேசியது:

புதிதாகக் கட்டப்பட்ட தலைமைச் செயலகக் கட்டடத்தை தமிழக அரசு என்ன செய்யப்போகிறதோ என்ற பதிலுக்காகக் காத்திருந்தேன். கடைசியில் மருத்துவமனையாகப் பயன்படுத்திக் கொள்ளப் போகிறார்கள் என்ற பதில் கிடைத்துள்ளது.

மருத்துவமனையாகப் பயன்படுத்துவதில் தவறில்லை: இதற்கும் நானே வழி காட்டியிருக்கிறேன். என் ஆயுள் காலத்திற்குப் பிறகு கோபாலபுரம் வீட்டை மருத்துவமனையாகப் பயன்படுத்த வேண்டும் என்றுதான் எழுதிக் கொடுத்திருக்கிறேன்.

அதேசமயம் 500 கோடி ரூபாய் செலவழித்து கட்டப்பட்ட கட்டடம் அது. ஒவ்வொரு நாளும் காலை, மாலையும் நேரில் சென்று பார்த்து, முதல்வர் நூறாவது முறையாக வருகிறார் என்றெல்லாம் சொல்லும் அளவுக்கு நான் தொட்டுத் தொட்டுப் பார்த்து கட்டிய கட்டடம்.

அது என் சொந்தக் கட்டடமா மக்களுக்குச் சொந்தமான கட்டடம். அது அழகுறவும், பயனுறவும் இருக்க வேண்டும் என்பதற்காக ஆசையோடு கட்டிய கட்டடம். சுதந்திர இந்தியாவின் முதல் தமிழ்நாட்டு முதல்வராக இருந்தவர் ஓமந்தூர் ராமசாமி ரெட்டியார். காங்கிரஸ் கட்சியினரே மறந்துவிட்ட நிலையில் அவர் பெயரில் அந்த இடத்திற்கு ஓமந்தூரார் வளாகம் என்று பெயரிட்டேன். அவர் ஆண்டதின் நினைவாகத்தான் அந்த இடத்தில் புதிய தலைமைச் செயலகமும் கட்டப்பட்டது.

தாராளமாக சட்டப்பேரவை உறுப்பினர்கள், அமைச்சர்கள் புழங்கும் வகையில் விஸ்தாரமாக கட்டப்பட்ட கட்டடத்தை வேண்டாம் என்று கூறிவிட்டு நாங்கள் குருவிக் கூட்டில்தான் இருப்போம் என்றால் அது உங்கள் பாடு, உங்களை நம்பி வந்தவர்கள் பாடு.

தமிழ்நாட்டில் துக்ளக் தர்பார் ஆட்சி நடைபெற்றுக் கொண்டிருக்கிறது. நண்பர் துக்ளக் சோவை நான் சொல்லவில்லை. அந்த ஆட்சி நீண்ட நாள் நடைபெற முடியாது. கூடாது. மக்கள் கண்ணை மூடிக்கொண்டே இருக்க மாட்டார்கள்.

சமச்சீர் கல்வி: சமம் என்ற வார்த்தையே அதிமுக ஆட்சியாளர்களுக்குப் பிடிக்காது. தந்தைப் பெரியார் பெயரில் நூற்றுக்கணக்கான இடங்களில் சமத்துவபுரம் வீடுகளைக் கட்டினேன். அதைப்போல ஜெயலலிதா ஓர் இடத்திலாவது சமத்துவபுர வீடுகள் கட்டுவாரா? அடிக்கல்கூட நாட்டமாட்டார். ஏனென்றால் அவருக்குச் சமத்துவம் பிடிக்காது.

இதைப்போலத்தான் சமச்சீர் கல்வியையும் எதிர்த்தார். உச்சநீதிமன்றம் வரை சென்று வெற்றிபெற்றிருக்கிறோம்.

உச்சநீதிமன்றம் தன்னுடைய தீர்ப்பில் அரசியல் உள்நோக்கத்தோடு சமச்சீர் கல்வி நிறுத்தப்பட்டிருக்கிறது என்று சுட்டிக் காட்டியிருக்கிறது. கல்வித் துறை செயலாளராக இருக்கும் சபீதா திமுக ஆட்சியில் சமச்சீர் பாடத்திட்டங்கள் தரமானவை என்று கூறிவிட்டு, இப்போது அதிமுக ஆட்சியில் பாடங்கள் தரமில்லாதவை என்று அவர் கூறியதற்கு உச்சநீதிமன்றமே கண்டனம் தெரிவித்துள்ளது.

நீக்கப்பட்ட பகுதிகள்: பாடப்புத்தகங்களில் செம்மொழி என்ற வார்த்தை வந்தாலே நீக்கியிருக்கின்றனர். ஒரு பாடப்புத்தகத்தில் ஒரு பகுதியில் சிவப்பு வண்ணம் பூசப்பட்ட ஆப்பிள் படம். மறு பகுதியில் மாணவர்கள் வண்ணம் பூச வேண்டும் என்று இருக்கிறது. அந்தப் பகுதியில் சிவப்பு வண்ணத்தை பூசாமல் கறுப்பு வண்ணத்தையா பூசுவான். ஏன் பச்சை வண்ணம் பூசமாட்டானா?

இதைப் போல உதயசூரியன் வந்தால் மறைத்திருக்கின்றனர். கிரகணத்தைப் பற்றிய பாடம் படிக்கும்போது சூரியன், சந்திரன், பூமி இல்லாமல் எப்படி பாடம் நடத்த முடியும்

ஆனால், மாணவர்கள் மறைக்கப்பட்ட பகுதிகளில் என்ன இருக்கிறது என்பதைச் சுரண்டியாவது பார்த்துவிடுவார்கள் என்றார் கருணாநிதி.

மேயர் மா.சுப்பிரமணியன், தென் சென்னை மாவட்ட செயலாளர் ஜெ.அன்பழகன் எம்.எல்.ஏ. உள்பட பலர் கூட்டத்தில் பங்கேற்றனர்.

- தினமணி