நீதிபதி சென் பதவி நீக்கம்: மாநிலங்களவை ஒப்புதல்

கொல்கத்தா உயர் நீதிமன்ற நீதிபதி செüமித்ர சென்னைப் பதவி நீக்கம் செய்வதற்கு மாநிலங்களவை வியாழக்கிழமை ஒப்புதல் அளித்தது.

அவரைப் பதவி நீக்கம் செய்ய குடியரசுத் தலைவருக்குப் பரிந்துரை செய்வது தொடர்பான தீர்மானம் மீது நடந்த ஒட்டெடுப்பில், அதற்கு ஆதரவாக 189 உறுப்பினர்களும், எதிராக 17 உறுப்பினர்களும் வாக்களித்தனர்.

இன்னும் ஒரு வாரத்துக்குள், மக்களவையில் இப்பிரச்னை குறித்து வாக்கெடுப்பு நடத்தப்படும் என்று எதிர்பார்க்கப்படுகிறது. மக்களவையும் நீதிபதி சென்னைப் பதவி நீக்கம் செய்ய ஒப்புதல் அளிக்கும் பட்சத்தில், இரு அவைகளின் ஒப்புதலும் குடியரசுத் தலைவருக்கு அனுப்பப்படும். அதன் அடிப்படையில், நீதிபதி சென்னைப் பதவி நீக்கம் செய்து குடியரசுத் தலைவர் உத்தரவு பிறப்பிக்க முடியும். 1990-களில் வழக்குரைஞராக இருந்த போது ரூ.24 லட்சம் முறைகேடு செய்ததாக நீதிபதி சென் மீது குற்றம் சாட்டப்பட்டது. மாநிலங்களவை அமைத்த 3 நபர் குழு அந்த குற்றச்சாட்டை உறுதி செய்தது.

இந்திய நாடாளுமன்ற வரலாற்றில் முதன்முறையாக... இந்திய வரலாற்றில் நீதிபதி ஒருவரைப் பதவி நீக்கம் செய்ய மாநிலங்களவை ஒப்புதல் அளிப்பது இதுவே முதல் முறையாகும். மக்களவையிலும் இதுவரை இது போன்ற ஒப்புதல் வழங்கப்பட்டதில்லை.

சட்டப்படி, உயர் நீதிமன்ற அல்லது உச்ச நீதிமன்ற நீதிபதிகளின் பதவி நீக்கம் குறித்தத் தீர்மானம் கொண்டுவரப்பட்டால், அவைக்கு வந்துள்ள மற்றும் வாக்கெடுப்பில் கலந்து கொள்ளும் உறுப்பினர்களில் 3-ல் 2 பங்கு ஆதரவு இருந்தால்தான் அந்தத் தீர்மானம் நிறைவேறும்.

நீதிபதி சென்னின் பதவி நீக்கம் குறித்த வாக்கெடுப்பின் போது, மாநிலங்களவையில் வியாழக்கிழமை 207 உறுப்பினர்கள் இருந்தனர். அதில் ஒருவர் வாக்கெடுப்பில் கலந்து கொள்ளவில்லை.

-- தினமணி