நித்தி விவகாரம்! ரஞ்சிதாவிடம் சிபிசிஐடி விசாரணை!

by **krishnaamma** Fri Aug 19, 2011 2:00 pm

சாமியார் நித்தியானந்தா விவகாரத்தில் நடிகை ரஞ்சிதாவிடம் சிபிசிஐடி போலீசார் விசாரணை நடத்தினார்கள். சுமார் 1 மணி நேரம் நடந்த இந்த விசாரணையின்போது, நடிகை ரஞ்சிதா பரபரப்பு வாக்குமூலம் அளித்திருப்பதாகவும் தகவல்கள் வெளியாகியுள்ளன. பெங்களூரூவில் உள்ள நித்யானந்தாவின் பிடதி ஆசிரமத்தின் மேலாளர் ஸ்ரீநித்ய ஆத்ம பிரமானந்தா, சென்னை போலீஸ் கமிஷனர் திரிபாதியிடம் ஒரு புகார் மனு கொடுத்தார். அந்த புகார் மனுவில், நித்யானந்தா மற்றும் நடிகை ரஞ்சிதா சம்பந்தப்பட்ட ஆபாச படங்களை வெளியிடாமல் இருக்க முதலில் ரூ.60 கோடி பணம் கேட்டார்கள் என்றும், பின்னர் ரூ.35 கோடி தரவேண்டும் என்று மிரட்டினார்கள் என்றும், இறுதியாக தியாகராயநகரில் உள்ள ஒரு ஓட்டலில் சிறை வைத்து ரூ.30 லட்சம் வரை பணத்தை பிடுங்கிக் கொண்டனர் என்றும் தெரிவித்திருந்தார்.

இந்த புகார் மனு மீது போலீசார் வழக்குப்பதிவு செய்தனர். சன் பிக்சர்ஸ் தலைமை நிர்வாகி சக்சேனா, அவரது உதவியாளர் அய்யப்பன் உள்பட 7 பேர் மீது இந்த வழக்கில் குற்றம் சுமத்தப்பட்டிருந்தது. இதற்கிடையில் வழக்கு சி.பி.சி.ஐ.டி. போலீஸ் விசாரணைக்கு மாற்றப்பட்டது. சி.பி.சி.ஐ.டி. போலீசார் இந்த வழக்கு தொடர்பாக பலருக்கு சம்மன் அனுப்பி ரகசியமாக அழைத்து விசாரித்து வருகிறார்கள். அந்த வரிசையில் சமீபத்தில் நடிகை ரஞ்சிதாவிடமும் சிபிசிஐடி போலீசார் ரகசிய விசாரணை நடத்தியுள்ளனர். சுமார் 1 மணி நேரம் வரை நடந்த இந்த விசாரணையில் ரஞ்சிதா பரபரப்பு வாக்குமூலம் கொடுத்திருப்பதாக தகவல்கள் வெளியாயின. அதுபற்றிய விவரங்களை வெளியிட போலீசார் மறுத்து விட்டனர்.

இந்நிலையில் நேற்று சாமியார் நித்தியானந்தாவும் சிபிசிஐடி தலைமை அலுவலகத்தில் நேரடியாக ஆஜராகி சிபிசிஐடி விசாரணைக்கு ஒத்துழைப்பு கொடுத்துள்ளார். அவரும் போலீசாரிடம் வாக்குமூலம் கொடுத்திருப்பதாக சிபிசிஐடி வட்டார தகவல்கள் தெரிவிக்கின்றன.
நன்றி : தினமலர்