வீட்டில் 21 விஷ பாம்புகள்

by ரேவதி Fri Aug 19, 2011 10:51 am

கோவை : ஒரே வீட்டில் 21 விஷ பாம்புகள் பிடிக்கப்பட்டதால் மக்கள் அதிர்ச்சி அடைந்தனர். கோவையில் மக்கள் நெரிசல் மிகுந்த உப்பார வீதியில் குடியிருப்புகள் நெருக்கமாக உள்ளன. இங்குள்ள ரேஷன் கடை பின்புறமுள்ள ஒரு வீட்டில் ஜவுளி இயந்திர உதிரிபாக குடோன் உள்ளது. உள்ளே இயந்திரங்களுடன் குப்பைகள் குவிந்து கிடந்தன.
நேற்று காலை ரேஷன் கடைக்கு வந்தவர்கள் குடோனுக்குள் பெரிய பாம்பு ஒன்று ஊர்ந்து செல்வதை கவனித்தனர். போலீசுக்கும், தீயணைப்பு துறைக்கும் தெரிவித்தனர்.

தகவல் அறிந்து பாம்பு பிடிப்பதில் வல்லவரான சினேக் முருகனும், உதவியாளர் செல்வமும் வந்தனர். சினேக் முருகன் குடோனுக்குள் சென்று 6 அடி நீள பாம்பு ஒன்றை பிடித்தார். அது கொடிய விஷமுள்ள கண்ணாடி விரியன். பாம்பை பிடித்து பைக்குள் போட்டு திரும்பும்போது, இன்னொரு பாம்பு கண்ணில் பட்டது. அதையும் பிடித்தார்.
தொடர்ந்து பாம்புகள் ஒன்றன் பின் ஒன்றாக படையெடுத்தன. 2 மணி நேரம் போராடி சிறியதும், பெரியதுமாக மொத்தம் 17 பாம்புகளை உயிருடன் பிடித்தார். 4 பாம்புகள் இறந்து கிடந்தன.

சமீபத்தில்தான் தாய் பாம்பு குட்டி போட்டிருக்கலாம் என தெரிகிறது. பாம்பு குவியலை கண்டு அப்பகுதி மக்கள் வெலவெலத்து போயினர். பிடிபட்ட பாம்புகள் மதுக்கரை அருகே வனப்பகுதியில் விடப்பட்டன. சினேக் முருகன் கூறுகையில், ‘’இன்னும் 2 மாதங்கள் கவனிக்காமல் விட்டிருந்தால் பாம்புகள் நூற்றுக்கணக்கில் பெருகி இருக்கும்’’ என்றார்.

தினகரன்