அற்புதம் அம்மா அறிவது - யமுனா ராஜேந்திரன்

by கண்ணன்3536 Thu Aug 18, 2011 10:06 am

அற்புதம் அம்மா அறிவது - யமுனா ராஜேந்திரன்

18 ஆகஸ்ட் 2011
ஈராயிரம் ஆண்டுகளின் முன்பு அந்த நிலம் பூந்தோட்டமாக இருந்தது. அழகாக அணிவகுத்துச் செல்லும் எறும்புகளைத் தொடர்ந்து குந்தியபடி நகர்ந்த குழந்தைகள் ரோஜா பதியனிடம் வந்து சேர்ந்ததும் தயங்கி நின்றனர். எறும்புகள் ஆயிரமாயிரமாய் மடியும் என்பதால் கையில் ஏந்தியிருந்த பூவாளித் தண்ணீரை வார்க்க மனமில்லாது ரோஜாச் செடியைப் பறித்து வேறிடம் பதித்தனர். இரண்டாயிரம் ஆண்டுகளின் பின் மூவண்ணக் கொடியுடன் மரணம் அந்த பூமியில் காலடி வைத்தபோது ரோஜாக்கள் வாடி உதிர்ந்தன. 40.000 சிறிறெறும்புகள் மடிந்தன. சிறுமியர் நசுங்கினர். 2009 ஆம் ஆண்டு மே 18 அசோகச் சக்கரம் பின்தலையில் சுழல, செஞ்சேனையின் மாபெரும் தலைவர் இலங்கைச் சிங்கத்தின் கையில் பச்சை இரத்தநெடி வீசிய வாளுக்குப் பதில் தமது இலச்சினைகள் பதித்த புத்தம் புதிய கறுத்த பென்னாம் பெரிய கோலிகள் தந்தார். அடர்ந்து கறுத்த சீருடையும் இரத்தச் சிவப்பில் பட்டியும் அணிந்து, முண்டுகட்டிய அழகிய பெண்கள் பறிமாற கால்கள் தடுமாற அவர்கள் இரவை நிறைத்தனர். 60,000 விதவைகள். 40,000 அநாதைக் குழந்தைகள். 40,000 காணாமல் போனோர். 40,000 சிதறிய உடல்கள். புத்தர் புன்னகைத்தார். இரவல் காந்தியின் உயிரின் விலை இதுவென்றது முள்ளிவாய்க்காலின் கறுத்த புகை வானம். அதேயென்றபடி துள்ளித்துள்ளி ஆடிக்களித்தது கோதபாயாவின் குறி. அமைதி தீவில் எங்கும் பரவியது. அடர்ந்த பச்சை வனங்களின் அருவிநீரில்; தமிழர் குருதி வழிந்து பெருக்கெடுத்து புத்த பிக்குகளின் பாதங்களை நனைத்தது. சாந்தி சாந்தி என்றபடி படையினர் கையில் கங்கணம் கட்டி ஆசிவழங்கினர் புத்தனின் அடிநடந்தவர். இரண்டாயிரம் ஆண்டுகளின் பின் 40,000 எறும்புகள் மடிந்தன. 40.000 மனிதர் மடிந்தனர். பேரறிவாளன். முருகன், சாந்தன். இன்னும் ஈராயிரம் ஆண்டுகள் நடந்தும் கடந்தும் வாழ்வர். அற்புதம் அம்மாவின் ஒரெயொரு மகனுக்காக 4000 மகன்கன், மகள்கள். சே குவேராவிற்கு ஒரு தென் அமெரிக்க மோட்டார் சைக்கிள் டயரி. பேரறிவாளனுக்கு 2000 மோட்டார் சைக்கிள் குறிப்பேடுகள். அன்னையே, அற்புதம் அன்னையே, கண்ணீர் திடமாகி உறைந்து நீதி கோரி நிற்கும் தாய்மையே, உயிர்தரு தருவே, அழகாக அணிவகுத்துச் செல்லும் எறும்புகளைத் தொடர்ந்து குந்தியபடி நகர்ந்த குழந்தைகளென ரோஜா பதியனிட மறுபடி நாங்கள் வந்திருக்கிறோம். பேரறிவாளன். முருகன், சாந்தன். இன்னும் ஈராயிரம் ஆண்டுகள் நடந்தும் கடந்தும் வாழ்வர். இரவல் காந்தியின் உயிரைவிடவும் பெரிது அடிமை பூமியில் ஒருபோது சுதந்திரமாய், அழகிய நடனமிட்டு நகர்ந்து, உயிர்த்திருந்த ஒரெயொரு சிற்றெரும்பின் ஜீவன்.