ரூ.30 கோடி மதிப்புள்ள அரசு நிலத்தை அபகரித்ததாக தேமுதிக எம்எல்ஏ மீது புகார்

kitcha · kitcha Thu Aug 18, 2011 4:09 pm

சேலம் மாநகரத்தில் அழகாபுரம் ரெட்டியூரில் உள்ள இஸ்மாயில் கான் ஏரிக்கு சொந்தமான 6.89 ஏக்கர் நிலம் 39/1, 39/2, 39/3 ஆகிய சர்வே எண்களின் படி வருவாய்துறை பதிவேடுகளில் ஏரி நிலமாகவே கணக்கில் உள்ளது.

ஆனால், சேலம் மாநகராட்சி டவுன் சர்வே எண்படி இதே மூன்று எண்களும், சேலம் வடக்கு தொகுதி சட்டமன்ற உறுப்பினரும், சேலம் மாவட்ட தேமுதிக செயலாளருமான அழகாபுரம் மோகன்ராஜ் பெயரில் உள்ளது.

மேற்கண்ட விவரங்களை கொண்டு அரசு நிலத்தை மோகன்ராஜ் போலி ஆவணங்கள் மூலம் தன்னுடைய நிலமாக மாற்றியுள்ளார் என்று தமிழ்நாடு மனித உரிமைகள் அமைப்பின் செயலாளர் பூமொழி 18.08.2011 அன்று காலை சேலம் மாவட்ட ஆட்சியரிடமும், சேலம் மாநகர ஆணையரிடமும் புகார் கொடுத்துள்ளார்.

இதுதொடர்பாக பூமொழி நம்மிடம் பேசும்போது, 2011ஆம் ஆண்டு சட்டமன்ற தேர்தலில் சேலம் வடக்கு தொகுதிக்கு தேமுதிக வேட்பாளராக மோகன்ராஜ் போட்டியிடும்போது, இதே மூன்று சர்வே எண்களின் படி உள்ள 6.89 ஏக்கர் நிலம் தனக்கு சொந்தமானது என்று தனது சொத்துக் கணக்கில் சேர்த்து தேர்தல் ஆணையத்துக்கு கணக்கு காட்டியுள்ளார்.

இந்திய அரசியல் சட்டத்தின்படி அரசு சொத்தை தன்னுடைய சொத்தாக மாற்றிக் காட்டிய மோகன்ராஜை கைது செய்வதுடன், சட்டமன்ற உறுப்பினர் பதவியில் இருக்கும் அவரை நீக்கக்கோரியும் மாவட்ட ஆட்சியரிடம் மனு கொடுத்துள்ளதாக தெரிவித்தார்.

மேலும் பூமொழி கூறுகையில், கடந்த 2001 முதல் 2006ஆம் ஆண்டு வரை சேலம் மாநகராட்சி மேயராக இருந்த அதிமுகவைச் சேர்ந்த சுரேஷ்குமார், மோகன் ராஜின் சொந்த தம்பி ஆவார். சுரேஷ் குமார் மேயராக இருந்தபோதுதான் இந்த மோசடிகள் நடந்திருக்கும் என்று சந்தேகம் அடைகிறோம் என்றார்.

nakkheeran