மீட்புக்கு வழி

இயேசுவின் சீடர்கள் பன்னிருவர். அவர்களுள் இருவர் குறிப்பிடத்தக்கவர். ஒருவர், சீடர்களுள் தலைவர் என்று கரு தும் நிலையில் இருந்தவர்; மற்றவர் இயேசுவின் பொருளாளரைப்போலச் செயல்பட்டவர். ஒருவர் பேதுரு. மற்றவர் யூதா. பேதுருவைப் பீட்டர் என்றும், யூதாவை யூதாஸ் என்றும் கூறுவர். பேதுரு, இயேசுவிற்குப்பின் அவர் உருவாக்க எண்ணிய திருச்சபையின் தலைவரானார். மற்றவர் இயேசுவை முப்பது வெள்ளிக் காசுகளுக்காகக் காட்டிக் கொடுத்தார்.

இருவருமே இயேசு வாழ்ந்த காலத்தில் தவறு செய்தவர்கள்தான். இயேசுவை யூதர்கள் கைது செய்வதற்கு முன்னதாக, இயேசுவிடம் பேதுரு, ‘‘உமக்காக என் உயிரையும் கொடுப்பேன்’’ என்றபொழுது, இயேசு அவரிடம் “எனக்காக உயிரையும் கொடுப்பாயோ? நீ மும்முறை என்னை மறுதலிக்குமுன் சேவல் கூவாது என உறுதியாக உனக்குச் சொல்கிறேன்’’ என்றார். அதனையும் பேதுருவிடம் தனியாகச் சொல்லவில்லை.

அப்பொழுது அனைத்துச் சீடர்களும் உடனிருந்தனர். இயேசுவுக்காக உயிரையும் கொடுப்பேன் என்ற பேதுரு பகைவர்களுக்குப் பயந்து, ‘நான் அவரை அறியேன்’ என்று ஒரு முறை அல்ல, மூன்று முறை கூறினார். மூன்றாம் முறை கூறியதும் சேவல் கூவியது. (யோவான், 18, 27.)

பேதுருவுக்கு இயேசு கூறியது நினைவுக்கு வந்தது. தாம் தவறு செய்துவிட்டதை உணர்ந்து அழுதார்.

தாம் தவறு செய்வோம் என்று இயேசு முன்னரே அறிந்திருந்ததை எண்ணியபொழுது ஏற்பட்ட துன்பத்தைக் காட்டிலும், தன் னிடம் இயேசுவே முன்னறிவித்திருந்தும், தவறு செய்துவிட்ட தம் நிலையை எண்ணும் பொழுது அத்துன்பம் அதிகமானது. பிற சீடர்கள் இதனை அறியும்பொழுது, தம்மை அவர்கள் எப்படி நம்புவார்கள் என்று நினைத்தபோது வேதனை அதிகரித்தது.

தம் சீடர்களுடன் தம்முடைய கடைசி இரவுணவை அருந்தியபொழுது, “என்னுடன் இந்தக் கிண்ணத்தில் கைவிடு பவர்களுள் ஒருவர் என்னைக் காட்டிக் கொடுப்பார்’’ என்றார் இயேசு. யாரைக் கூறுகிறார் என்று இயேசுவிற்கும் யூதாவுக்கும் மட்டுமே தெரியும். உணவுண்டு முடிக்குமுன் யூதா வெளியில் செல்லும்பொழுது ‘விரைவில் செல்’ என்று இயேசு யூதாவைப் பார்த்துக் கூறுகிறார். அப்பொழுதும் மற்ற சீடர்களுக்குத் தெரியாது. முன்னரே திட்டமிட்டபடி இயேசுவைக் காட்டிக் கொடுக்கத்தான் செல்கிறான் என்பது, இயேசுவுக்கும் யூதாவுக்கும் மட்டுமே தெரியும்.

இருவரும் தவறு செய்தாலும் இருவருடைய குற்றங்களில் எது பெரியதாகத் தோன்றும்? பேதுரு அனைவரின் முன் எச்சரிக்கைபோல் அறிவுறுத்தப்பட்டார். யூதாவிடம் அவ்வாறு இயேசு எதுவும் கூறவில்லை. பேதுரு ஒரு முறை அல் ல; மூன்று முறை தவறு செய்கிறார். அவர் செய்தது பெருங் குற்றமாகத் தோன்றினாலும் அவர் தலைவரானார்.

யூதா பெற்ற காசுகள் மன அமைதியைத் தராததால், அவற்றை எறிந்துவிட்டுத் தற்கொலை செய்துகொண்டார். (மத்தேயு, 27, 5) காரணம் என்ன? பேதுரு மறுத்த பாவத்திற்காக மனம் வருந்தினார்; அழுதார்; இயேசு மன்னிப்பார் என்று நம்பிக்கை கொண்டார். யூதாவுக்கு அத்தகைய நம்பிக்கை மனத்தில் இல்லை. தவறு செய்வது இயற்கை. அதற்காக மனம் வருந்தி இறைவனிடம் சென்றால், மீட்பு உண்டு. நம்பிக்கை இல்லாமல், கோழைத்தனமாகத் தற்கொலை செய் துகொள்வது மீட்பருடைய வழியாகாது. இதுவே, இவர்கள் இருவரின் வாழ்வும் நமக்குக் கற்றுத் தரும் பாடமாகும்.

"தவறு செய்வது இயற்கை. அதற்காக மனம் வருந்தி இறைவனிடம் சென்றால், மீட்பு உண்டு "- சாியாக சொன்னீா்கள். கா்த்தா் உங்களை ஆசீா்வதிப்பாராக.