அதற்கும் பரிட்சையாய் இருக்கலாம்...

by **rameshnaga** Tue Aug 09, 2011 8:21 pm

First topic message reminder :

உதிரும் பூக்கள்தான் ...
உணவு தந்து விடுகிறது
பூக்காரிகளுக்கு.
************************************
மனிதன்...
மிருகம்....
ஆறு வித்தியாசங்களெல்லாம் வேண்டாம்.
அறவே வித்தியாசமில்லை.
************************************
தெரு விளக்கில் பூச்சிகள்...
அதற்கும் பரிட்சையாய் இருக்கலாம்.
பாவம்! அதற்கும் வீடு இல்லை
என்னைப் போல.
**************************************
தலைவர்கள் ....
கட்சி மாறலாம்
கூட்டணி மாற்றலாம்..
தப்பில்லை
இலக்ஷியங்களை நிறைவேற்றுவதற்காக.
***************************************
தூண்டிலில் மீன்
சிக்காமல் தப்பி விடலாம்...
ஆனால்...பாவம்!
புழு செத்துவிடுகிறது.
****************************************
பாவம்!காகங்கள்.
பகிர்ந்துண்ணக் கற்றுக் கொடுத்தவைதாம்.
எவனோ எழுதிய கதையில்...
வடை திருடியதால்..
திருட்டுப் பட்டத்தோடு அலைகின்றன..
இத்தனை தலைமுறைகளாய்.
***************************************
ஒரு கணம்தான்...ஒரே ஒரு கணம்தான் ...
பல நூறு எண்ணங்கள் எனக்குள் மட்டும்.
பூமியெங்கும்...இந்தக் கணத்தில்
யோசிக்கத் தெரிந்தவன் 700 கோடிப் பேர்..
பாவம்!கடவுள்!
இத்தனை கோடிப் பேரின்..
இத்தனை கோடிக் கோடிப் பேராசைகளை..
எப்படி நிறைவேற்றுவார்?
********************************************
எழுதிய வார்த்தைகளால்
எழுதப் படலாம்
நானும்.
*****************************************