இளமை திரும்புமா?

பொருள்தேடுவதற்காக வேற்று நாட்டுக்குச் சென்ற தலைவன் ஒரு பக்கம்; காதல் தலைவி மறுபக்கம். இளமை பூத்துக்குலுங்கும் இல்லாள், கணவன் அருகில் இல்லாமையால் தவிக்கிறாள். அங்கோ, மனைவியை விட்டுப் பிரிந்துவிட்டோமே என்ற ஏக்கப் பெருமூச்சுடன் இன்னல் பல ஏற்று சொல்லொணாத் துயரத்தில் தவிக்கிறான் தலைவன். இழந்த பொருளை மீட்கலாம். பிரிவால் கழிந்துவிட்ட இளமையை மீட்க முடியுமா? இன்றைய இளைஞர்களின் வெளிநாட்டு மோகத்தை, கலித்தொகை காட்சி ஒன்று படம்பிடித்துக் காட்டுகிறது.

""புரிபுநீ புறம் மாறிப் போக்கு எண்ணிப், புதிதீண்டிப்
பெருகிய செல்வத்தால் பெயர்த்தரல் ஒல்வதோ -

... ... ... ... ...

வளமையோ வைகலும் செயலாகும்; மற்று இவள்
முளைநிரை முறுவலார் ஆய்த்துள் எடுத்தாய்ந்த
இளமையும் தருவதோ, இறந்தபின்னே?''

(பாலைக்கலி-15)

"வெளிநாட்டில் பொருள் தேடும் பொருட்டு நீ இவளை விட்டுப்போனால், உன் செயலை எண்ணி இவள் வாடுவாள். அசோக மரத்தின் இளந்தளிர்போன்ற மேனியுடைய இவள் அழகெல்லாம் உன் பிரிவால் பசலை படர்ந்து கழிந்துவிடும். புதிதாகச் செல்வத்தை நீ தேடிக்கொண்டு வரும்போது உன் செல்லத்தின் தளிர் மேனி அப்படியே இருக்குமா? தளர்வடைந்து விடாதா? அந்த இளமையை எங்கிருந்து எடுத்துவருவாய்?

இவள், ஒளிவீசும் மதிமுகத்தாள். உன் பிரிவால் அந்த முகம் களையிழந்து, பாம்பு விழுங்கும் என்று கூறப்படுகின்ற கிரணம் விழுந்த நிலவு போலன்றோ காட்சியளிக்கும். "பொய்யற்ற கேள்வியால் சிறந்த அறிவாளரோடு சேர்ந்து மனம் மாசற்றவனாகி விடுவேன்' என்கிறாயே, உன் புதிய தெளிவான இந்த பதில், இவளின் கழிந்துவிட்ட இளமையை மீட்டுத் தந்துவிடுமா?

மொட்டவிழ்ந்து மணம் வீசும் நீலமலர் போன்ற மையிட்ட இவளது கண்கள், நீ பிரிந்து சென்றதால் அழுது அழுது விளக்கில் எரிகின்ற திரியிலிருந்து உருகிச் சொட்டும் நெய் போலல்லவா கண்ணீரைச் சிந்தும். நீ வெளிநாடு சென்று ஏற்றுக்கொள்ள இருக்கும் வணிகத் தொடர்புகள் இவளது கண்ணொளியை மீட்டுத்தருமா?

ஆகையால், இவைகளை எல்லாம் நீ நன்றாக ஆராய்ந்து ஒரு நல்ல முடிவு எடுப்பாயாக! இளமை போனபின்னர் நீ கொண்டு வரும் பொருள்கள் அதை மீட்டுத்தராது. ஆகவே, இங்கிருந்தபடியே உன் இல்லாள் அருகிருக்க அவளையும் மகிழ்வித்து, நீயும் மகிழ்ந்து பொருள்தேடு. பொருள்தேடும் புறவாழ்வைவிட அகவாழ்வுதான் சிறந்தது!' என்று தலைவனின் பிரிவால் வாடும் தலைவியின் நிலைகண்டு, தோழி, தலைவனுக்கு அறிவுறுத்துகிறாள்.

அ. சுப்பிரமணியன்

வணக்கம் சிவா.பள்ளியில் விரும்பி படித்தது இது.

kungumapottu gounder wrote:வணக்கம் சிவா.பள்ளியில் விரும்பி படித்தது இது.

வணக்கம் வழக்கறிஞரே! மீண்டும் பள்ளிப் பருவத்து நினைவை இக்கட்டுரை ஏற்படுத்தியிருந்தால் மிக்க மகிழ்ச்சி!