தியேட்டரையும் விட்டுவைக்கவில்லை ஆடித்தள்ளுபடி!

kitcha · kitcha Tue 9 Aug 2011 - 10:48

தங்க நகையில் தொடங்கி ஜவுளிக்கடை, பலசரக்கு கடை உள்ளிட்ட வீட்டு உபயோக பொருட்கள் விற்பனையகங்களில் ஆடிமாதம் பிறந்து விட்டாலே தள்ளுபடி விற்பனை களைகட்டி விடும். மக்கள் கூட்டம் ஜவுளிக்கடைகளுக்கும், செல்போன் கடைகளுக்கும் படையெடுப்பதாலோ, என்னவோ தியேட்டர்களில் கூட்டம் குறைந்து விட்டது என நினைத்த சில தியேட்டர்காரர்கள், ஆடி அதிரடி தள்ளுபடியை அறிவித்திருக்கிறார்கள். சென்னையில், டி.வி.டி., வி.சி.டி. என்று பெருகி விட்ட இந்த காலக்கட்டத்தில் தியேட்டர்களுக்கு மக்கள் செல்வது என்பது பெரிய விஷயமாக மாறி விட்டது. அதிலும் தியேட்டர் கட்டணத்தை நினைத்தால் மக்களுக்கு அலர்ஜி வந்து விடும். இதன் காரணமாக தியேட்டர்களுக்கு மக்கள் வரத்து வெகுவாக குறைந்து விட்டது.

ரசிகர்களை மீண்டும் திரையரங்கம் பக்கம் வரவழைக்கும் வகையில் எல்லா துறைகளிலும் தொற்றிக் கொண்ட ஆடி தள்ளுபடி, தற்போது சினிமா தியேட்டரையும் விட்டு வைக்கவில்லை. சென்னையில் ஆங்காங்கே சில இடங்களில் சில பிரபல தியேட்டர்களின் பெயருடன் ஆடி தள்ளுபடி குறித்த போஸ்டர்கள் ஒட்டப்பட்டுள்ளன. அதில் டிக்கெட் கட்டணத்தில் 10 சதவீதம் ஆடித் தள்ளுபடி என்று குறிப்பிடப்பட்டுள்ளது.

என்னதான் ஆடித்தள்ளுபடி அறிவித்தாலும் படம் நன்றாக இருந்தால் மட்டுமே தியேட்டருக்கு மக்கள் கூட்டம் வரும் என்பது தியேட்டர்காரர்களுக்கு தெரியாதா என்ன? அதேபோல 300 ரூபாய் கட்டணத்தில் 30 ரூபாயை குறைந்து விட்டு ஏற்கனவே 25 ரூபாய், 30 ரூபாய்க்கு விற்கப்பட்டு வரும் கூல்ட்ரிங்ஸ், ஐஸ்க்கீரிம், ஸ்நாக்ஸ் வகைகளின் விலையை இன்னும் வெகுவாக கூட்டி விடுவார்கள் என்பது பொதுமக்களுக்கு தெரியாதா என்ன?

cinema.dinamalar

தியேட்டரையும் விட்டுவைக்கவில்லை ஆடித்தள்ளுபடி! Nt110808140109000000