கோவையில் கிணற்றில் கார் விழுந்து 3 பேர் சாவு

by மகா பிரபு Mon Aug 08, 2011 11:37 pm

கோவை, ஆக.7: கோவையை அடுத்த பேரூரில் கிணற்றில் கார் விழுந்ததில் 2 பெண்கள் உள்பட 3 பேர் ஞாயிற்றுக்கிழமை இறந்தனர். காரில் இருந்த 2 ஆண் குழந்தைகள் காயங்களுடன் உயிர் தப்பினர்.

கோவை பேரூரை அடுத்த கரடிமடை அய்யாசாமி தோட்ட பகுதியைச் சேர்ந்தவர் திவாகர். இவர் பெரியகடை வீதியில் நகைக் கடை நடத்தி வருகிறார். இவரது மனைவி மீனா (எ) மீனாட்சி (28). இத்தம்பதிக்கு பவன்ஜித் (6), ஆதிஇந்திரஜித் (3) என்ற மகன்கள் உள்ளனர்.

ஞாயிற்றுக்கிழமை காலையில் உறவினர் வீட்டு நிகழ்ச்சி ஒன்றில் பங்கேற்பதற்காக மீனா, வசந்தி (51), கார் டிரைவர் சிவா (எ) சிவராஜ் (42), குழந்தைகள் பவன்ஜித், ஆதிஇந்திரஜித் ஆகியோர் புறப்படத் தயாராக இருந்தனர்.

ச்சமயத்தில் கார் ஓட்டுவதாகக் கூறி மீனாவே காரை ஸ்டார்ட் செய்தாராம். கார் ரிவர்ஸ் கியரில் இருந்ததால், உடனே பின் பக்கமாகச் சென்றதாம். இதனால் பதற்றமடைந்த மீனா, பிரேக் போடுவதற்குப் பதில் ஆக்சிலேட்டரை அழுத்தினாராம். இதில் கார் மேலும் வேகமாகப் பின்பக்கம் சென்றதாம்.

வீட்டின் எதிர்ப்புறம் இருந்த சுமார் 200 அடி ஆழ கிணற்றைச் சுற்றி அமைத்திருந்த கம்பி வேலியை அறுத்துக் கொண்டு கார் உள்ளே விழுந்தது. இதைப் பார்த்த கணவர் திவாகர், மாமனார் அய்யாசாமி ஆகியோர் அதிர்ச்சியில் உறைந்தனர்.

உடனே உறவினர்கள் கயிறு கட்டி கிணற்றில் இறங்கினர். அச்சமயத்தில் மீனா, வசந்தி, கார் டிரைவர் சிவா ஆகியோர் பலத்த காயங்களுடன் இறந்து கிடந்தனர்.

குழந்தைகள் இருவரும் காயங்களுடன் உயிருக்குப் போராடிக் கொண்டிருந்தனர். அவர்களை கயிறு கட்டி மேலே கொண்டு வந்து சிகிச்சைக்காக மருத்துவமனையில் சேர்த்தனர்.

தகவலறிந்த தீயணைப்புத் துறையின் தெற்கு நிலைய மேலாளர் அண்ணாதுரை தலைமையில் வீரர்கள் சம்பவ இடத்துக்குச் சென்று பொதுமக்கள் உதவியுடன் இறந்தவர்களின் உடலை மீட்டு, பரிசோதனைக்காக அரசு பொது மருத்துவமனையில் சேர்த்தனர்.

தினமணி