என்ன சலனம் ஏற்படுத்தி விடுவேன் நான்?

**rameshnaga** · **rameshnaga** Mon Aug 08, 2011 6:54 pm

நீளும் கைகளில்
நிலவு வந்து அமரும் ...
என்னும் குழந்தையின் பேராவலோடு
மூடித் திறந்து கொள்கின்றன
எனது கனவுகள்.

வாழ்வின்
மகத்தான நிமிடங்களைக்
கூடு கட்டுகிறது மனது....
மரணத்திற்குப் பின்னும் வாழும்
அதீத கற்பிதங்களுடன்.

இயல்பிலோ-
எல்லாத் திசைகளிலும்
அலைக்கழிகிறது வாழ்க்கை.

தரையை அடையாது
தனித்து விடுகிறது
எனது வாழ்வின் மழைத்துளி.

பறக்கும் கணங்களில்
எனது சிறகுகள் உதிர்ந்துவிட...
தரையில் வந்து தத்தளிக்கிறது
எனது பேராவல்கள்.

ஏனோ...
வளர....வளர...
வெற்றிடமாகிறேன் நான்.

கடைசியில்-
ஒரு பெருங்கடலில் சிதறும்
ஒரு நீர்த் துளியெனச்
சிதறி அடங்குகிறேன் நான்..

என்ன சலனம் ஏற்படுத்திவிடுவேன்...
அலைக்கழியும் இன்னுமோர் உயிரில்?.