"குட்டிச் சுவராய்ப் போக"- என்று மட்டும் என்னைத் திட்டாதீர்கள்.

**rameshnaga** · **rameshnaga** Mon Aug 08, 2011 8:52 pm

எனக்கு இந்தக்
குட்டிச்சுவர் பற்றிய கவிதை
எழுதுவதில் ஒரு தயக்கம் இருந்தது.

அதுவும் ஒரு காலத்தில்
பல செய்திகளைச் சொன்ன சுவர்தான்.

காதணிவிழா, காதலர்விழா, வரவேற்புகள்,
கண்ணீர் அஞ்சலிகள், திரையரங்க அழைப்புகள்..
எனப் பல செய்திகளைச் சொன்னதுதான்.

திடீரென அநாதரவாகிவிட..
அதன் மேல் இப்பொழுது
"ஆல்" முளைத்திருக்கிறது.
பாம்புகள் அவ்வப்போது வந்து போக..
காகங்களின் "டைனிங் டேபிள்" ஆகி இருக்கிறது.
கால் தூக்கும் நாய்களும், பறவைகளும்
கட்டணமில்லாக் கழிப்பிடமாய் அதை மாற்றிக் கொள்ள ..
குப்பைகள் கொட்டப்படும் இடமாகி விட்டது.

அந்தக் குப்பைகளை-
ஒருவன் கிளறிக் கொண்டிருக்கையில்
வீச்சமடிக்கத் துவங்கியது ..
மனிதர்களின் குப்பை மனங்கள்.

எங்கே...
நான் வெளிப்பட்டு விடுவேனோ?..
என்கிற அச்சத்தில் விலகுகிறேன் நான்.

என்றாலும்-
இன்னும் சில நூறாண்டுகளுக்குப் பிறகு
எவனாவது அகழ்ந்தெடுக்கையில்..
ஒரு வரலாறாகி விடும் இந்தக் குட்டிச் சுவர்.

**அருண்** · **அருண்** Mon Aug 08, 2011 9:18 pm

அருமை அய்யா..! கடந்த காலத்தை குட்டி சுவரில் உட்கார்ந்து பேசியதை நினைவுக்கு வருகிறது..!
எதுக்கு உங்கள நாங்க திட்ட போறோம் நினைவு படுத்தியமைக்கு நன்றி..! மகிழ்ச்சி