கடவுளைச் சந்திக்காதவன்......

by **rameshnaga** Fri Aug 05, 2011 6:20 pm

எனது சமையலறை -
எல்லாத் தெருக்களின் முனைகளிலும் இருந்தது.
குப்பைத்தொட்டியில்தானே நீங்கள்
மீந்தவற்றை எறிவீர்கள்?

எனது வரவேற்பறையில்-
கொசுக்கள் அதிகம்.
அதனால் என்ன?-
சங்கீதம் இலவசம்.

எப்பொழுதும் சூரியன் ஒளிரும் -
என் வீட்டில்
பகல் பொழுதில் மின்வெட்டு இல்லை.
இரவிலோ-
வெளிச்சம் என்பதே இல்லை.

எனது படுக்கையறையில்-
நிறையப் பேர் இருக்கிறார்கள்.
ஆனால்-
எனக்கு மட்டும்தான் ஆறறிவு-
உங்களின் அறிவியல் படி.

இந்த உலகின்-
மிகப் பெரும் விசாலமான வீட்டில்
நான் வசிக்கிறேன்.
இதுவரை என்னைக்-
கடவுள் சந்தித்ததேயில்லை.
எனக்கும் அவரைச் சந்திக்க
விருப்பமில்லை.

ஐந்தாண்டுகளுக்கு ஒருமுறை
நானும் இந்த நாட்டின் மன்னன் ஆகிறேன்.
ஆனால் என்ன இழவு-
இந்தக் கருப்பு மைதான் அழிவதில்லை
எத்தனை வருடமானாலும்.