40 வருடங்களாக வாரிசை எதிர்பார்த்த 60 வயது பெண்ணுக்கு ஆண் குழந்தை; சோதனை குழாய் மூலம் பிறந்தது

ஈரோடு மாவட்டம் கவுந்தம்பாடி என்ற ஊரை சேர்ந்தவர் ரிங்கேஸ்வரன் (வயது 66). இவரது மனைவி சரஸ்வதி (60). இந்த தம்பதியினருக்கு திருமணம் நடந்து 40 வருடங்களாக குழந்தை இல்லை. குழந்தை பெறுவதற்காக பல்வேறு மருத்துவ மனைகளில் சிகிச்சை பெற்றும் பயன் கிடைக்கவில்லை.

ரிங்கேஸ்வரன் பி.எஸ்.என்.எல். நிறுவனத்தில் அதிகாரியாக இருந்து ஓய்வு பெற்றவர். 40 வருடங்களாக வாரிசு இல்லாததால் கணவன்-மனைவி இருவரும் மனம் சோர்ந்து விட்டனர். சோதனை குழாய் வயது அறுபதை கடந்து விட்டாலும் தங்களுக்கு வாரிசு வேண்டும் என்பதில் உறுதியாக இருந்தனர்.

நண்பர் ஒருவர் மூலம் பழனிபாலாஜி கருத்தரிப்பு மையத்துக்கு சென்றனர். டாக்டர் செந்தாமரை செல்வி 2 பேரையும் மருத்துவ பரிசோதனை செய்தார். கருத்தரிப்பதற்கான கால கட்டத்தை சரஸ்வதி கடந்து விட்டார் என்றாலும் நவீன சிகிச்சை மூலம் செயற்கை முறை கருத்தரித்தலுக்கு அவரை டாக்டர்கள் தயார் செய்தனர்.

சோதனை குழாய் மூலம் சரஸ்வதி கர்ப்ப பையில் கரு செலுத்தப்பட்டது. பின்னர் நடந்த ரத்த பரிசோதனை, ஸ்கேன் மூலம் அவர் கருதரித்தது உறுதியானது. 10 மாதங்கள் டாக்டர்கள் கண்காணிப்பில் சரஸ்வதிக்கு சிறப்பு மகப் பேறு சிகிச்சை அளிக்கப்பட்டது.



கடந்த 28-ந்தேதி ரிங்கேஸ்வரன்-சரஸ்வதி தம்பதிக்கு அழகான ஆண் குழந்தை சிசரியன் மூலம் பிறந்தது. குழந்தை இரண்டே கால் கிலோ எடையுடன் ஆரோக்கியமாக பிறந்தது.

இந்த மருத்துவ சாதனை குறித்து சென்னையில் டாக்டர் செந்தாமரைச் செல்வி நிருபர்களிடம் கூறியதாவது:-

60 வயதை கடந்த தம்பதிக்கு சோதனை குழாய் மூலம் குழந்தை பிறந்து இருப்பது அரிய சாதனை. வாரிசு இல்லை என்ற அவர்களுடைய 40 வருட ஏக்கம் தீர்ந்து இருக்கிறது. மாதவிடாய் நின்று விட்ட பெண்ணை நவீன சிகிச்சை மூலம் அதற்கு தயார் செய்து கருவை சுமக்க வைத்தோம். மருத்துவ சிகிச்சைக்கு இருவரும் முழு ஒத்துழைப்பு கொடுத்தனர். கர்ப்ப பை நன்றாக இருந்தால் எந்த வயதிலும் குழந்தை பெற்றுக் கொள்ளலாம். எத்தனை வயது ஆனாலும் எங்களால் குழந்தையை வளர்க்க முடியும் என்று அவர்கள் நம்பிக்கையுடன் கூறியதால்தான் இந்த சாதனையை செய்து இருக்கிறோம். இது மிகவும் மகிழ்ச்சி அளிக்கிறது.

ரிங்கேஸ்வரன்- சரஸ்வதி தம்பதி கூறியதாவது:- எங்களைப் போன்ற வயதான தம்பதியினரும் மனம் தளராமல் குழந்தையை பெற்றுக் கொள்ள முடியும் என்ற விழிப்புணர்வை ஏற்படுத்துவதற்காகவே நாங்கள் இங்கு வந்தோம். எங்களுக்கு 1971-ம் ஆண்டு திருமணம் நடந்தது. 1973 வரை எந்த சிகிச்சையும் பெறவில்லை. அதன் பிறகு 2001 வரை சிகிச்சைக்காக பல இடங்களுக்கு சென்று ஓய்ந்து விட்டோம். இனி குழந்தை பெற வாய்ப்பு இல்லை என்ற முடிவுக்கு வந்தோம் சந்ததி இல்லை என்பதை நினைத்து அழுதோம்.

2010-ல் நண்பர் ஒருவர் மூலம் இந்த மருத்துவ மனையில் சிகிச்சை பெற்றோம். வயது அதிகமானதால் குழந்தையை எப்படி காப்பாற்ற போகிறோம் என்ற எண்ணம் ஏற்பட்டது. ஆனாலும் எங்களுக்கு ஒரு வாரிசு வேண்டும் என்று முடிவு செய்து சிகிச்சைக்கு சம்மதித்தோம். வயதை பற்றி நீங்கள் கவலைப்படவில்லை என்றால் இதை ஒரு மருத்துவ சவாலாக எடுத்து செய்து காட்டுவோம் என்று டாக்டர் கூறினார்.

40 வயதுக்கு பிறகு இந்த குழந்தை கடவுள் அருளாலும், டாக்டர்கள் முயற்சியாலும் கிடைத்து இருக்கிறது. என்ன தான் வசதி இருந்தாலும் குழந்தைதான் சிறந்த செல்வம். இவ்வாறு அவர்கள் குழந்தைக்கு முத்தமிட்டபடி கண்ணீர் மல்க கூறினார்கள்.

மாலை மலர்