இதயத்தைப் பாதிக்கும் பித்தக்கல்

வாட்டி வதைக்கும் நோய்களில் வயிற்றுவலியும் ஒன்று இதற்கு காரணம், பித்தப்பைக் கற்கள்.

பித்தப்பையானது வயிற்றின் வலப்பக்கம் மேற்புறத்தில் கல்லீரலில் உற்பத்தியாகி, பித்தநாளங்களின் வழியாகப் பித்தப்பையில் சேமிக்கப்படுகிறது. பித்தப்பை, சேமிக்கப்பட்டுள்ள பித்தநீரை திடப்படுத்துகிறது. இந்த பித்தநீர், உணவு சீராக செரிக்க மிக முக்கியமாகும்.

பித்தப்பையில் திடப்படுத்தப்பட்டுள்ள பித்தநீர் முக்கிய பித்த நாளத்தின் வழியாக சிறுகுடலை வந்தடைந்து உணவு செரிக்க முக்கியப் பங்கு வகிக்கிறது. பித்தநீர், சிறுகுடலில் வந்து சேர்ந்து, அமிலத்தன்மையை நடுநிலைப் படுத்துவதால் சிறுகுடலில் புண் (அல்சர்) ஏற்படுவது தவிர்க்கப்படுகிறது.

பித்தப்பையில் கற்கள்

நோய்க் கிருமி தாக்குதல், பித்தநாள வெடிப்பு போன்றவற்றால் பித்தப்பையில் கற்கள் தோன்றுகின்றன.

பித்தப்பை கற்கள் பலவகைப்படும். கொலஸ்டிரால் கற்கள் வெளிர்ந்த மஞ்சள் நிறமாக இருக்கும். வழக்கமாக ஒரு கல் உண்டாகும். கொலஸ்டிரால் அதிகமாக இருப்பதால் இவ்வகை கற்கள் உண்டாகின்றன. இவை 1 முதல் 2 செ.மீ. அளவு வரை இருக்கும். பித்தப்பை கற்களில் 70 சதம் இவ்வகை கற்களாக இருக்கும்.

சுண்ணாம்புக் கற்கள் இவை பித்தப்பை, பித்த நாளத்தில் ஏற்படும் கிருமிகளால் உண்டாகின்றன. பல கற்கள் உண்டாகும். சிறிய வடிவத்தில் இருக்கும். அபாய கற்கள் என்று அழைப்பர். ஏனெனில் இத்தகைய சிறிய எண்ணற்ற கற்கள் பித்தப்பையில் இருந்து வெளியேறி பித்த நாளத்தை அடைத்து, மஞ்சள் காமாலையை ஏற்படுத்தும். இவை கருநிறமாக இருக்கும்.

கொலஸ்டிரால் கற்களும், சுண்ணாம்புக் கற்களும் சேர்ந்து தங்க நிறத்தில் ஒரு கல் உண்டாகும்.

ஏன் ஏற்படுகிறது?

பித்தப்பை கற்கள் ஏற்படுவது ஏன்?

அதிக அளவு கொலஸ்டிரால் இருப்பது

உடல் பருமனாக இருப்பது

சர்க்கரை நோய்

கர்ப்பிணிப் பெண்கள்

அதிக பிள்ளைகள் பெற்றவர்களுக்கு

கருத்தடை மாத்திரைகள் பயன்படுத்துபவர்களுக்கு

புகை பிடிப்பவர்களுக்கு

மதுபானம் அருந்துபவர்களுக்கு

குடல்நோய் உள்ளவர்களுக்கு

கணைய நோய் உள்ளவர்களுக்கு

பித்தப்பை கற்கள் வர வாய்ப்புகள் உள்ளன.

அறிகுறி

பித்தப்பை கற்கள் உள்ளவர்களுக்கு வயிற்றுவலி (வயிற்றின் மேல்பகுதியில்) , செரியாமை, பித்தப்பையில் உள்ள கற்கள் பித்தப்பையை அடைத்தல், பித்த நாளத்தை அடைத்தல், காய்ச்சல், மஞ்சள்காமாலை ஆகியவை தோன்றும்.

பின்விளைவுகள்

பித்தப்பையில் கற்கள் ஏற்படுவதால் அடிக்கடி வயிற்றுவலி, செரிமானக் கோளாறு ஏற்படும்.

பித்தப்பையில் அடைப்பு ஏற்பட்டு மிகுந்த வலியை ஏற்படுத்தும். பித்தப்பையில் உள்ள பித்தநீரில் கிருமிகள் ஏற்பட்டு, பித்தப்பை முழுவதும் சீழ்கட்டியாக மாறிவிடும். பித்தப்பை அழுகி விடவும்கூடும். அழுகிய பித்தப்பை வெடித்து அதில் உள்ள சீழ் வயிறு முழுவதும் பரவி, மிகுந்த அபாயத்தை ஏற்படுத்தும்.

பித்தப்பையில் புற்றுநோய் ஏற்படவும் வாய்ப்பு உண்டு. மஞ்சள்காமாலையும் ஏற்படுகிறது.

பித்தப்பை கெட்டுவதால் இதயத்திற்கு செல்லும் இரத்த ஓட்டம் குறைந்துவிடும். இதனால் இதயம் சீராக இயங்க முடியாது. இதய அடைப்பு போன்ற நோய்கள் ஏற்படும்.

மருத்துவம்

பித்தப்பையில் கற்கள் இருப்பது தெரிந்தால், உடனே வைத்தியம் செய்ய வேண்டும்.

பித்தப்பை கற்களை மட்டும் அகற்றினால் அதே பித்தப்பை மீண்டும் கற்களை உருவாக்கிவிடும். அதைத் தடுக்க பித்தப்பையும் சேர்த்து அகற்றிவிட வேண்டும்.

அதனால் பாதிப்பு எதுவுமில்லை. ஈரலில்தான் பித்தம் உருவாகிறது. பித்தப்பை அகற்றுவதால் ஈரலில் இருந்து பித்தம் நேரடியாக குடலுக்கு சென்றுவிடும். செரிமானத்துக்குத் தேவையான பித்தம் உடனுக்குடன் கிடைத்துவிடும். எனவே, பித்தப்பையை எடுப்பதால் ஒரு பாதிப்பும் ஏற்படாது.