வீரபாண்டி ஆறுமுகம் கைது செய்யப்பட்டதற்கு எதிர்ப்பு: சேலத்தில் 11 பஸ்கள் கல்வீசி உடைப்பு

by **சிவா** Sun Jul 31, 2011 8:08 am

சேலத்தில் வீரபாண்டி ஆறுமுகம் கைது செய்யப்பட்டதை கண்டித்து தி.மு.க.வினர் பஸ்கள் மீது கல்வீசி தாக்குதல் நடத்தினார்கள். இதில் 11 பஸ்கள் உடைக்கப்பட்டன.

முன்னாள் அமைச்சர் வீரபாண்டி ஆறுமுகம், நிலம் அபகரிப்பு வழக்கில் நேற்று திடீரென கைது செய்யப்பட்ட தகவல் பரவியதும் சேலம் மாநகரம் முழுவதும் தி.மு.க.வினர் திடீரென போராட்டத்தில் குதித்தனர்.

வாசலில் மறியல்

கைது செய்யப்பட்ட வீரபாண்டி ஆறுமுகத்துடன் வேன் போலீஸ் நிலையத்தைவிட்டு வெளியே வந்ததும், வாசலில் திரண்டிருந்த தி.மு.க. நிர்வாகிகள் தொண்டர்கள் வேன் முன்பு ரோட்டில் அமர்ந்து மறியலில் ஈடுபட்டனர்.

மறியலில் ஈடுபட்டவர்களில் 20 பேரை போலீசார் கைது செய்தனர். அவர்கள் மீது 5 பிரிவுகளில் வழக்கு பதிவு செய்யப்பட்டு சிறையில் அடைக்கப்பட்டனர்.

பஸ்கள் மீது கல்வீச்சு

இதற்கிடையில், சேலம் மாநகரம் முழுவதும் ஆங்காங்கே பஸ் மீது கல்வீச்சு சம்பவங்கள் நடைபெற்றன. வேகமாக செல்லும் மோட்டார் சைக்கிளில் வந்த மர்ம கும்பல்கள் திடீர் திடீரென அந்த வழியாக சென்று கொண்டிருந்த அரசு பஸ்கள் மீது கல்வீசி தாக்குதல் நடத்தினார்கள்.

சில இடங்களில் ரோடு ஓரத்தில் நின்ற கும்பல் திடீரென பஸ் மீது கல்வீசிவிட்டு அங்கிருந்து ஓட்டம் பிடித்தது. இந்த சம்பவங்களில் 11 பஸ்களின் கண்ணாடிகள் உடைந்து நொறுங்கின. பெரியார் மேம்பாலத்தில் சென்ற பஸ்சில இருந்த பெண் பயணி புஷ்பா கல்வீச்சில் காயம் அடைந்தார்.

500 பேர் கைது

சேலம் கன்னங்குறிச்சியில் போலீசார் ரோந்து சென்றபோது, அங்கு கடைகளை அடைக்க கூறிய ஒரு கும்பலை சேர்ந்த 15 பேரை போலீசார் கைது செய்தனர். அதேபோல் நகர் முழுவதும் முன்னெச்சரிக்கை நடவடிக்கையாக 50-க்கும் மேற்பட்டவர்களை போலீசார் பிடித்து சென்றனர்.

மாவட்டம் முழுவதும் ஆங்காங்கே மறியல் செய்ய முயன்றவர்கள் சுமார் 500 பேரை போலீசார் கைது செய்து, பெரிய அளவில் அசம்பாவித சம்பவங்கள் நடைபெறாமல் தடுத்தனர்.

வக்கீல்கள் முற்றுகை

முன்னாள் அமைச்சர் வீரபாண்டி ஆறுமுகம் நேற்று காலை கைது செய்யப்பட்டபோது, அவருடன் சென்ற தி.மு.க. வக்கீல் மூர்த்தி, வீரபாண்டி ஆறுமுகத்தின் உதவியாளர் சேகர் ஆகியோரை போலீசார் போலீஸ் நிலையத்தில் இருந்து வெளியேற அனுமதிக்கவில்லை. ஐகோர்ட்டு அனுமதியின் பேரில், முன்னாள் அமைச்சருடன் சென்ற வக்கீலை போலீசார் கைது செய்த சம்பவம் வக்கீல்கள் மத்தியில் அதிருப்தியை ஏற்படுத்தியது.

தகவல் அறிந்ததும் சேலம் வக்கீல்கள் சங்க நிர்வாகிகள் உள்பட திரளான வக்கீல்கள் சேலம் டவுன் போலீஸ் நிலையத்துக்கு வந்தனர். அவர்களை போலீஸ் நிலைய வளாகத்துக்குள் அனுமதிக்க போலீசார் மறுத்துவிட்டதால், போலீசாருடன் வக்கீல்கள் கடும் வாக்குவாதத்தில் ஈடுபட்டனர். அதனால் போலீஸ் நிலையம் முன்பு 1 மணி நேரம் பரபரப்பு நிலவியது. பின்னர் பகல் 11.30 மணி அளவில் வக்கீல் மூர்த்தி, மற்றும் முன்னாள் அமைச்சரின் உதவியாளர் சேகர் ஆகியோர் விடுவிக்கப்பட்டனர்.

தினதந்தி