அழகிரி - வீரபாண்டி ஆறுமுகம் சந்திப்பு :ஸ்டாலின் ஆதரவாளர்கள் "சந்தேகம்'

தி.மு.க., பொதுக்குழுக் கூட்டத்தில், பாதியில் இருந்து வெளியேறிய அழகிரி, முன்னாள் அமைச்சர் வீரபாண்டி ஆறுமுகத்தைச் சந்தித்தார். இதனால், தி.மு.க., தலைவர் பதவிக்கு "குறி' வைத்து, "காய்' நகர்த்தப்படுகிறதோ என்ற சந்தேகம், ஸ்டாலின் ஆதரவாளர்களிடையே எழுந்துள்ளது. சமீப காலமாக, அரசியல் பாரம்பரியம் மிக்க தி.மு.க.,வின் தலைமைப் பதவியைக் குறி வைத்து, தமிழக அரசியலில் காய் நகர்த்தப்பட்டு வருகிறது. தி.மு.க., தலைவர் கருணாநிதிக்குப் பின், கட்சித் தலைமைப் பொறுப்புக்கு, ஸ்டாலின் வர வேண்டும் என, 90 சதவீதம் கட்சியினர் விருப்பம் தெரிவித்துள்ளனர். கோவையில் நடந்த தி.மு.க., பொதுக்குழுக் கூட்டத்திலும் இது வெடித்தது. இதனால், கூட்டத்தை முழுவதுமாக முடிக்காமல், அழகிரி வெளியேறிய சம்பவமும் நடந்தேறியது.

தி.மு.க., தலைவராக கருணாநிதிக்குப் பின், அழகிரி வர வேண்டும் என்பதை, இரண்டாம் கட்ட தலைவர்கள், மறைமுகமாக வெளிப்படுத்தி வருகின்றனர். கட்சியுடன், குடும்பத்தை ஐக்கியப்படுத்தியுள்ள தி.மு.க., தலைவர் கருணாநிதி, "இருதலைக் கொள்ளி எறும்பு' போல் இக்கட்டான சூழ்நிலைக்குத் தள்ளப்பட்டுள்ளார். எதிலும் தீர்க்கமான முடிவை, முன் கூட்டியே எடுக்க வல்ல தி.மு.க., தலைவர் கருணாநிதி, அடுத்த தலைவர் யார் என்று துணிச்சலாக அறிவிக்க முடியாமல், மவுனம் காத்து வருகிறார்.ஆனால், கட்சித் தலைவர் பதவியைக் கைப்பற்றும் ஆயத்தப்பணியில் அழகிரி, ஸ்டாலின் கோஷ்டியினர், ஆதரவு திரட்டும் வேலையில் இறங்கியுள்ளனர்.

நில அபகரிப்பு வழக்கில் சிக்கிய முன்னாள் அமைச்சர் வீரபாண்டி ஆறுமுகம், கோர்ட்டில் சரணடைந்து வீடு திரும்பினார். சாதாரண வழக்கில் சிக்கிய வீரபாண்டி ஆறுமுகத்தை, அழகிரி நேரில் வந்து சந்தித்துச் சென்றார். இச்சம்பவம், தி.மு.க.,வில் பெரும் புயலைக் கிளப்பியுள்ளது. ஆரம்பம் முதலே, அழகிரிக்கு ஆதரவாக, வீரபாண்டி ஆறுமுகம் இருந்து வந்துள்ளார். குடும்பத் திருமண நிகழ்ச்சிகளில் அழகிரிக்கு "கட்-அவுட்' வைத்தும், அதில் அவர் கலந்து கொண்டும் சிறப்பித்துள்ளார். ஸ்டாலின் சேலம் வந்த போது, அரசு நிகழ்ச்சியைப் புறக்கணித்து, மருத்துவமனையில் வீரபாண்டி ஆறுமுகம் படுத்ததும், அழகிரி மூலம் கே.பி.ராமலிங்கத்துக்கு ராஜ்யசபா எம்.பி., பதவி வாங்கிக் கொடுத்ததும் என, அடுத்தடுத்த "காய்' நகர்த்தல் நடந்து வருகிறது. வீரபாண்டி ஆறுமுகத்தை, வீட்டில் வந்து அழகிரி சந்தித்துச் சென்றதன் பின்னணியில், தி.மு.க., தலைவர் பதவிக்கு, சேலத்தில் பிள்ளையார் சுழி போடப்படுகிறதோ என்ற சந்தேகம், "ஸ்டாலின்' ஆதரவாளர்களிடையே எழுந்துள்ளது.
நன்றி: தினமலர்