“தேசியப் பாதுகாப்பு” என பூச்சாண்டி காட்டப்படுவதை நிறுத்த மக்கள் உதவ வேண்டும் - கைரி|

சமூக அமைப்புக்கள் கூடுதலான தகவல் சுதந்திரத்தை விரும்பினால் “தேசியப் பாதுகாப்பு’”குறித்து அரசாங்கம் கொண்டுள்ள கவலைகளைப் போக்குவதற்கு முக்கியப் பங்காற்ற வேண்டும் என அம்னோ இளைஞர் தலைவர் கைரி ஜமாலுதீன் கேட்டுக் கொண்டுள்ளார்.

அரசாங்கச் சேவையில் ரகசியச் சூழ்நிலை “வேரூன்றி விட்டதை” ஒப்புக் கொண்ட அவர், பிரதமர் நஜிப் அப்துல் ரசாக் தலைமையிலான நடப்பு நிர்வாகம் பின்பற்ற விரும்புகிற ‘மேலும் திறந்த அணுகுமுறைக்கு’ எதிராக “ஏற்றதாக இல்லை” என குறிப்பிட்டார்.

“தேசியப் பாதுகாப்பு என்பது அரசாங்கம் பயன்படுத்தக் கூடிய எளிதான விஷயமாகும். நான் அதனை அவர்களிடமிருந்து அகற்ற விரும்புகிறேன்,” என கைரி வழக்குரைஞர் மன்ற அரங்கத்தில் தகவல் சுதந்திரம் மீதான கருத்தரங்கில் கூறினார்.

“நஜிப் மென்மேலும் திறந்த நிர்வாகத்தை அமலாக்க விரும்புகிறார். ஆனால் உள்துறை அமைச்சு போன்ற அரசாங்க அமைப்புக்கள் இன்னும் “ரகசியம்” என்னும் சிந்தனையிலேயே மூழ்கியிருக்கின்றன.”

“எடுத்துக்காட்டுக்கு எக்கானாமிஸ்ட் சஞ்சிகையின் பகுதிகள் கறுப்பு மையால் அழிக்கப்பட்ட சம்பவத்தை எடுத்துக் கொள்ளுங்கள். அதற்கு அந்த சிந்தனையே காரணம். அவ்வாறு செய்யுமாறு அமைச்சரோ அல்லது வேறு யாருமோ உத்தரவிடவில்லை.”

கைரி, சர்ச்சைக்குரிய ஊடக ஆலோசனை மன்ற யோசனையையும் சாடினார். அந்த மன்றத்தில் ஊடகப் பேராளர்களைக் காட்டிலும் அரசாங்கப் பேராளர்கள் அதிகமாக இருக்க வேண்டும் என எண்ணத் தூண்டியதும் அதே சிந்தனைதான் என்றார் அவர்.

குறிப்பாக இணைய ஊடகப் பேராளர்கள் இல்லாததை சுட்டிக் காட்டிய அவர், அரசாங்கச் சார்பு “மலேசிய வலைப்பதிவு இல்ல” பேராளர்களை இணைய ஊடகங்களுக்குப் பதில் சேர்த்துக் கொள்ள அரசாங்கம் முடிவு செய்தததை கண்டித்தார்.

அரசாங்கத்தை முடிவு செய்வது வாக்காளர்களாகும். எனவே தாங்கள் விரும்பியதை அடைய முயற்சி செய்வது மக்களைச் சார்ந்துள்ளது என ரெம்பாவ் எம்பியுமான கைரி சொன்னார்.

மலேசியாஇன்று