இலவசங்கள்:தமிழக அரசு பதில் அளிக்க சுப்ரீம் கோர்ட் உத்தரவு

by positivekarthick Sun Jul 31, 2011 4:50 am

புதுடில்லி:"அரசியல் கட்சிகள், தங்களின் தேர்தல் அறிக்கையில் வெளியிட்ட இலவசங்களை வழங்க, மாநில அரசின் நிதியை பயன்படுத்தலாமா என்பது குறித்து பரிசீலிக்கப்படும்' என, சுப்ரீம் கோர்ட் தெரிவித்துள்ளது.தமிழகத்தில் முந்தைய தி.மு.க., ஆட்சியில், இலவச "டிவி'க்கள் வழங்கப்பட்டதற்கும், தற்போதைய அரசு, மேல்நிலைப் பள்ளி மாணவர்களுக்கு இலவச லேப் - டாப் வழங்க முடிவு செய்துள்ளதற்கும், எதிர்ப்பு தெரிவித்து, சுப்ரமணியம் பாலாஜி என்ற வழக்கறிஞர், சுப்ரீம் கோர்ட்டில் மனு தாக்கல் செய்திருந்தார்.
சுப்ரீம் கோர்ட் நீதிபதிகள் சதாசிவம், சவுகான் ஆகியோரைக் கொண்ட பெஞ்ச் முன், இந்த மனு நேற்று முன்தினம் விசாரணைக்கு வந்தது. அப்போது நீதிபதிகள் கூறியதாவது:இலவசங்கள் வழங்குவது தொடர்பாக, அரசியல் கட்சிகள் தங்களின் தேர்தல் அறிக்கையில், சில வாக்குறுதிகளை அளித்துள்ளன. இந்த இலவசங்களை வழங்க, மாநில அரசின் நிதியை பயன்படுத்தலாமா என்பது குறித்து, கோர்ட் ஆய்வு செய்யும். மேலும், "டிவி', லேப் - டாப், மிக்சி, கிரைண்டர் ஆகியவற்றை, வாக்காளர்களுக்கு இலவசமாக வழங்குவது தொடர்பாக, வழிகாட்டும் விதிமுறைகளை உருவாக்குவது குறித்து, முடிவு செய்யப்பட்டுள்ளது.

இலவசங்கள் வழங்குவது தொடர்பாக, வழிகாட்டும் விதிமுறைகள் எதுவும் உருவாக்கப்பட்டுள்ளதா என்பது குறித்து, தமிழக அரசு, பதில் மனு தாக்கல் செய்ய வேண்டும். மூன்று வாரங்களுக்குள் இதுகுறித்து பதில் அளிக்க வேண்டும்.அதே நேரத்தில், வறுமைக்கோட்டுக்கு கீழ் வசிக்கும் மக்களுக்கு, இதுபோன்ற இலவசங்களை வழங்குவதில் தவறு எதுவும் இல்லை. தேர்தல் நடத்தை விதிமுறைகள் அமலில் இருக்கும் போது, அரசியல் கட்சிகள் இலவசங்கள் வழங்குவது தொடர்பான நடவடிக்கைகளில், தேர்தல் கமிஷன் தலையிடலாம். ஆனால், ஓட்டு எண்ணிக்கை முடிந்தபின், இலவசங்கள் வினியோகிக்கப்பட்டால், தேர்தல் கமிஷன் எதுவும் செய்ய முடியாது. இந்த மனு மீதான அடுத்த விசாரணை, வரும் ஆக., 19ம் தேதிக்கு ஒத்தி வைக்கப்படுகிறது.
இவ்வாறு நீதிபதிகள் உத்தரவிட்டனர்.
தினமலர்