ஸ்டாலின் விடுவிப்பு; தானாக முன்வந்து கைதாகி நாடகம்: மாவட்ட எஸ்பி

positivekarthick · positivekarthick Sat Jul 30, 2011 5:58 pm

திருவாரூர், ஜூலை 30: ஸ்டாலினை நாங்கள் கைது செய்யவில்லை; தானாக முன்வந்து அவர் கைதானதாக நாடகம் நடத்தினர் என்று மாவட்ட எஸ்பி செய்தியாளர்களிடம் கூறினார்.
இன்று காலை கைது செய்யப்பட்ட மு.க.ஸ்டாலின் மதியம் 2 மணி வாக்கில் விடுவிக்கப்பட்டார். ஸ்டாலினுடன் வந்த பழனிமாணிக்கம் உள்ளிட்ட திமுக தலைவர்களும் விடுவிக்கப்பட்டனர். இதுகுறித்து செய்தியாளர்களிடம் பேசிய மாவட்ட எஸ்பி, ஸ்டாலினை நாங்கள் கைது செய்யவில்லை. மாணவர் ஒருவர் விபத்தில் இறப்பதற்குக் காரணமான சம்பவம் தொடர்பாக மாவட்ட திமுக செயலர் பூண்டி கலைவாணனிடம் விசாரணை நடத்த வந்தோம்; அவரை ஒப்படையுங்கள் என்றோம். அதற்கு ஸ்டாலின் தரப்பு மறுத்ததுடன் தானாகவே சாலை மறியல் போராட்டங்களில் ஈடுபட்டனர். தொடர்ந்து கைதாகினர். அவர்களை பாதுகாப்பாக திருவாரூர் அழைத்து வந்தோம். தற்போது, கலைவாணனை மட்டும் விசாரணைக்கு நிறுத்தி வைத்து, மற்றவர்களை விடுவித்துவிட்டோம் என்றார் அவர்.
இதைத் தொடர்ந்து, கலைவாணனைத் தவிர மற்றவர்கள் அனைவரும் மண்டபத்தை விட்டு வெளியேறினர்.
வீரபாண்டி ஆறுமுகம், ஜெ.அன்பழகன் உள்ளிட்ட திமுகவினருடன் இன்று காலை ஸ்டாலின் கைதானதாக வந்த தகவலும் தமிழகத்தில் பெரும் பரபரப்பை ஏற்படுத்தியது. இந்நிலையில், ஸ்டாலின் உள்ளிட்டோர் தாமாக முன்வந்து கைது நாடகம் நடத்தியுள்ளனர் என மாவட்ட எஸ்பி கூறியுள்ளது குறிப்பிடத்தக்கது.
தினமணி