தி.மு.க., நடத்திய போராட்டத்தால் விபரீதம்அப்பாவி மாணவன் விபத்தில் பரிதாப பலி

by positivekarthick Fri Jul 29, 2011 9:23 pm

திருவாரூர்: திருவாரூர் அருகே கொரடாச்சேரியில், தி.மு.க.,வினர் நடத்திய போராட்டத்தால், அப்பாவி பள்ளி மாணவன் விபத்தில் சிக்கி பலியானார்.மாநிலம் முழுவதும் தி.மு.க., சார்பில், வகுப்பு புறக்கணிப்பு போராட்டம் நடத்த நேற்று அழைப்பு விடுக்கப்பட்டது. ஆனால், திருவாரூர் மாவட்டத்தில், எந்த பள்ளி மாணவர்களும் வகுப்பு புறக்கணிப்பில் ஈடுபடவில்லை.தி.மு.க., மாவட்டச் செயலாளர் பூண்டி கலைவாணனின் சொந்த ஊரான கொரடாச்சேரியில் தி.மு.க.,வினர், அரசு ஆண்கள் மற்றும் பெண்கள் மேல்நிலைப்பள்ளி மாணவ, மாணவிகளை வலுக்கட்டாயமாக பள்ளியில் இருந்து அழைத்து வந்து, தஞ்சை- திருவாரூர் சாலையில் மறியல் செய்ய வைத்தனர்.சம்பவ இடத்துக்கு வந்த போலீஸார், மாணவர்களை அப்புறப்படுத்தினர். மீண்டும் பள்ளி செல்ல முற்பட்ட மாணவ, மாணவியரை தி.மு.க.,வினர் கட்டாயப்படுத்தி பஸ்ஸில் ஏற்றி, வீட்டுக்கு அனுப்பினர்.திருவாரூரில் இருந்து தஞ்சை நோக்கிச் சென்ற அரசு பஸ்ஸில், அளவுக்கு அதிகமாக மாணவர்களை ஏற்றி விட்டனர். அந்த பஸ், நேற்று காலை 11 மணியளவில் கொரடாச்சேரி அடுத்த மஞ்சக்கொல்லை அருகே சென்ற போது, எதிரே ஜல்லி ஏற்றி வந்த லாரி மீது மோதியது.சாலையோர பள்ளத்தில் பஸ் கவிழ்ந்தது. விபத்தில், அரசு பள்ளியில் எட்டாம் வகுப்பு படித்த, கிலேரியம் கிராமத்தை சேர்ந்த சேகர் மகன் விஜய் (13) என்ற மாணவன் சம்பவ இடத்திலேயே பரிதாபமாக இறந்தான்.செல்வராஜ் மகன் ஐயப்பன் (14), மற்றொரு சேகர் மகன் செந்தமிழன் (14), நாகராஜ் மகள் திவ்யா (17) உட்பட 16 பேர் படுகாயமடைந்து, திருவாரூர் அரசு மருத்துவக்கல்லூரி மருத்துவமனையில் சிகிச்சை பெறுகின்றனர்.கொரடாச்சேரி போலீஸார் விசாரிக்கின்றனர்.சம்பவத்தைக் கண்டித்து, திருவாரூர் பஸ்ஸ்டாண்டில், அனைந்திந்திய மாணவர் பெருமன்றம் சார்பில், நேற்று மாலை ஆர்ப்பாட்டம் நடந்தது.அப்பாவி மாணவன் உயிர் பலியாக காரணமான தி.மு.க.,வினரை கைது செய்ய வேண்டும், பள்ளி நிர்வாகம் மீது கடும் நடவடிக்கை எடுக்க வேண்டும், என்று கோஷங்கள் எழுப்பினர்.மாவட்டச் செயலாளர் பாலசுப்ரமணியன் தலைமை வகித்தார். மாநிலத் துணைச் செயலாளர் அருள்ராஜன், இளைஞர் பெருமன்ற மாவட்டப் பொறுப்பாளர்கள் மற்றும் ஏராளமான பெற்றோர் பங்கேற்றனர்.
பின்னணி என்ன?தி.மு.க., பொருளாளர் ஸ்டாலின், இன்று (29ம் தேதி) திருவாரூர் மாவட்டத்தில் சுற்றுப்பயணம் செய்து, பல்வேறு நிகழ்ச்சிகளில் பங்கேற்கிறார். அவர் வருகையின் போது, தனக்கு நல்ல பெயர் கிடைக்க வேண்டும் என்ற ஆசையில் மாவட்டச் செயலாளர் கலைவாணன், தனது ஆதரவாளர்களை ஏவி விட்டு, மாணவ, மாணவியரை மறியலில் ஈடுபட வைத்துள்ளார்.அவரது அரசியல் ஆசையால், பள்ளி மாணவன் விஜய் பரிதாபமாக பலியானான். அரசியல் ஆதாயம் தேடுவதற்காக, தி.மு.க., நடத்திய போராட்டம், கொரடாச்சேரி அரசுப்பள்ளி மாணவன் உயிரை பலி வாங்கியதால் பெற்றோர் மற்றும் பொதுமக்கள் பெரும் அதிருப்தியடைந்துள்ளனர்.
தினமலர்