தாயாய் பிறந்தநாள்

santhamurali · santhamurali Thu 28 Jul 2011 - 14:27

கருவில் நானிருந்த
காலம் முடிந்ததென்று
உன் கண்ணெதிரில்
நான் பிறந்த நாள் !.

அறியாத பருவத்தில் -நீ
அணிவித்த ஆடையுடன்
இனிப்புகள் வழங்கியே
இனிதாக கொண்டாடினேன்!
அழுது அடம்பிடித்து
பள்ளிக்கும் இனிப்பு கேட்டு
பகட்டுடனே பல
பிறந்தநாட்கள் பார்திருக்கிறேன்!
கல்லூரி தோழிகளின்
கனிவான பரிசேற்று
களிப்புடனே நான் கழித்த
பிறந்தநாட்கள் கலையவில்லை இன்றும்!
எந்தாயே...
இவ்வுலகில்,
உன் சாயலில் , உன் முத்திரையாய்
உன் மகளாய் உலாவந்த நாட்களோடு ,
என் முத்திரையை , என் சாயலிலே
ஈன்றெடுத்து ,
நான் பிறந்தேன்
தாயாய் புதிதாய்!