இன்று கார்கில் போர் நினைவு தினம்

dsudhanandan · dsudhanandan Tue Jul 26, 2011 8:32 am

1999ம் ஆண்டு இதே நாளில், கார்கில் மலைப்பகுதியில் ஊடுருவிய பாகிஸ்தான் ராணுவத்திடம் இருந்து, அப்பகுதியை இந்திய ராணுவம் மீட்டு வெற்றிக்கொடி நாட்டியது. கார்கில் போர் முடிந்து 12 ஆண்டுகள் ஆகிவிட்டன. இந்த போரில் நமக்கு வெற்றிதான். ஆனாலும் விலைமதிக்க முடியாத நமது சகோதரர்களின் உயிரை இழக்க வேண்டியதாயிற்று. நாட்டு மக்களுக்காக தங்களது இன்னுயிரை தியாகம் செய்த நமது ராணுவ வீரர்களுக்கு அஞ்சலி செலுத்தவும், காயமடைந்த வீரர்களை கவுரவிக்கும் விதமாகவும் ஆண்டுதோறும் ஜூலை 26ம் தேதி கார்கில் நினைவு தினம் கடைப்பிடிக்கப்படுகிறது.

இந்திய மாநிலங்களில் ஆறாவது பெரிய மாநிலம் காஷ்மீர். சீனா, பாகிஸ்தான், ஆப்கானிஸ்தான் ஆகிய மூன்று நாடுகளின் எல்லைக்கோடு இம்மாநிலத்தின் வழியே செல்கிறது. எங்கெங்கும் பசுமையான மலைகளும், பள்ளதாக்குகளும், ஆங்காங்கே அருவிகளும் நிறைந்தது காஷ்மீர். இம்மாநிலத்தில் உள்ள 15 மாவட்டங்களில் கார்கில் மாவட்டமும் ஒன்று. இது ஸ்ரீநகரில் இருந்து 288 கி.மீ., தூரத்தில் உள்ளது.

திட்டமிட்ட சதி: இந்திய - பாகிஸ்தான் எல்லையில் கரடுமுரடான, பனிபடர்ந்த சிகரங்களை கொண்ட கார்கிலில் சாதாரண சூழ்நிலையிலேயே தாக்கு பிடிப்பது கடினம். குளிர்காலத்தில் வெப்பநிலை மைனசுக்கும் கீழ் இறங்கிவிடும். இதனால் இரண்டு நாடுகளை சேர்ந்த வீரர்களும், செப்., 15 முதல் ஏப்., 15ம் தேதி வரை தங்களுக்குள் ஏற்படுத்திக்கொண்ட உடன்பாட்டின் அடிப்படையில் கார்கில் சிகரங்களிலிருந்து பின்வாங்குவார்கள். ஏப்ரலின் பிற்பகுதியில் தங்களது வழக்கமான நிலைகளில் பாதுகாப்பு பணிகளை தொடர்வர்.

1999 ஏப்ரலில் கார்கிலில் பாதுகாப்பு பணியை தொடர சென்ற இந்திய ராணுவத்துக்கு அதிர்ச்சி காத்திருந்தது. பாகிஸ்தான் ராணுவம், காஷ்மீர் பயங்கரவாதிகளுடன் கைகோர்த்துக்கொண்டு இந்திய பகுதிகளை ஆக்கிரமித்திருந்தது. ஆரம்பத்தில் 500 முதல் 1000 பேர் வரை ஊடுருவி இருக்கலாம் என இந்தியா நினைத்தது. ஆனால் 5 ஆயிரம் பேருக்கும் மேற்பட்டோர் எல்லை தாண்டி, இந்திய நிலைகளுக்குள் ஊடுருவி இருப்பது பின்னர் தெரிந்தது.

திடீரென நடைபெற்ற ஊடுருவல் அல்ல, பாகிஸ்தானில் நன்கு திட்டமிடப்பட்ட "ஆபரேஷன் பாதர்' என்ற பெயரில் நடத்தப்பட்ட அத்துமீறல் இது என கிடைத்த தகவல் இந்தியாவுக்கு அதிர்ச்சியளித்தது. முன்பே பலமுறை இந்த ஊடுருவல், திட்டமிடப்பட்டு கைவிடப்பட்டது, வெளிச்சத்துக்கு வந்தது. பாகிஸ்தானின் சதியை முறியடிக்க, "ஆபரேஷன் விஜய்' என்ற பெயரில் இந்தியா 1999 மே 26ம் தேதி ராணுவ நடவடிக்கையை தொடங்கியது.

முறியடிப்பு: பாகிஸ்தானின் சதித்திட்டத்தை முறியடிக்க, இந்திய ராணுவம், "ஆபரேஷன் விஜய்' என்ற பெயரில் மே 26ல், ராணுவ நடவடிக்கையை துவக்கியது. குளிர்மிக்க மலைப்பிரதேசங்களில் நமது ராணுவ வீரர்கள் உறுதியுடன் பேராடினர். அமெரிக்கா உள்ளிட்ட உலக நாடுகள் பலவும் பாகிஸ்தானுக்கு கண்டனம் தெரிவித்தன. வேறு வழியின்றி பாகிஸ்தான், பின்வாங்கத் துவங்கியது. தொடர்ந்து தனது நிலைகளில் முன்னேறிய இந்திய ராணுவம் பாகிஸ்தான் கைப்பற்றிய கார்கில் மலைப்பகுதியை ஜூலை 26ல் மீட்டு வெற்றிக்கொடி நாட்டியது.

ராணுவம் மீதான மரியாதையை பேணுவோம்

- தினமலர்