60 நாட்களில் 60 கொலை: முதல்வர் ஜெ.வுக்கு ஸ்டாலின் கேள்வி

**ந.கார்த்தி** · **ந.கார்த்தி** Sun Jul 24, 2011 7:22 am

ஜெயலலிதா பதவியேற்றபின்னர் 60 நாட்களில் 60 கொலைகள்
நடந்துள்ள நிலையில், சட்டம் ஒழுங்கைப் பராமரிப்பேன் என்று சூளுரைத்த
முதல்வர், இதற்கு என்ன பதில் சொல்கிறார் என திமுக பொருளாளர் மு.க.ஸ்டாலின்
கேள்வி எழுப்பியுள்ளார்.

ராயபுரத்தில் திமுக உயர்நிலை செயல்திட்டக்குழு தீர்மான விளக்கப் பொதுக்கூட்டத்தில் கலந்துகொண்டு ஸ்டாலின் பேசியதாவது:

சமச்சீர் கல்வித் திட்டம் என்பது ஏழை, பணக்காரர்கள் அனைவருக்கும்
பொதுவானது. கருணாநிதி கொண்டு வந்தார் என்பதற்காகவே ஜெயலலிதா அதை ரத்து
செய்தார். அவரது முயற்சி வெற்றி பெறாது.சரியான தீர்ப்பினை நீதிமன்றம்
விரைவில் வழங்கும்.

முதல்வர் பதவியேற்றவுடன் சட்டம், ஒழுங்கை நிலைநாட்டுவதுதான் தனது முதல்
வேலை என ஜெயலலிதா சூளுரைத்தார்.கடந்த 60 நாள்களில் மட்டும் தமிழகம்
முழுவதும் 60 கொலைகள், 120 வழிப்பறி கொள்ளைகள் மற்றும் 8 பாலியல் வன்முறை
சம்பவங்கள் நடைபெற்றுள்ளதாகத் தெரிகிறது.

கொள்ளையர்கள், ரவுடிகள் எல்லாம் அண்டை மாநிலங்களுக்கு இடம் பெயர்ந்து
விட்டதாக ஜெயலலிதா கூறினார்.அப்படியெனில் தற்போதைய சம்பவங்களில்
தொடர்புடையவர்கள் யார்?

நில மோசடிகளில் உண்மையிலேயே திமுக-வைச் சேர்ந்தவர்கள் ஈடுபட்டிருந்தால்
அவர்கள் மீது நடவடிக்கை எடுப்பதில் ஆட்சேபணை இல்லை. பொய்யான புகார்களைப்
பெற்றுப் பழிவாங்க யாராவது முயற்சித்தால் அதை நீதிமன்றத்தில் திமுக
சந்திக்கும். பொய் வழக்குப் பதிவு செய்யும் அதிகாரிகள் நீதிமன்றத்தில்
பதில் சொல்ல வேண்டிய கட்டாயம் ஏற்படும்.

இவ்வாறு அவர் கூறினார்.
TMT 60 நாட்களில் 60 கொலை: முதல்வர் ஜெ.வுக்கு ஸ்டாலின் கேள்வி 678642