2-வது கணவருடன் வாழ தடை: பஞ்சாயத்து தீர்ப்பை மீறிய பெண்ணுக்கு நூதன தண்டனை;

**இளமாறன்** · **இளமாறன்** Fri Jul 22, 2011 6:32 pm

மேற்கு வங்க மாநிலம் கிசான் கஞ்ச் மாவட்டம், கில்லாபரி பட்டா கிராமத்தைச் சேர்ந்தவர் பாத்திமா. சில வருடங்களுக்கு முன்பு இவருக்கும், பக்கத்து கிராமமான ராஜ்மகால் கிராமத்தைச் சேர்ந்த இத்ரிஸ் என்பவருக்கும் திருமணம் நடந்தது.

கணவன், மனைவிக்கு இடையே ஏற்பட்ட கருத்து வேறுபாடை தொடர்ந்து இருவரும் பிரிந்தனர். முறைப்படி விவாகரத்து செய்து கொண்டனர். பின்னர், உமருல்லா என்பவரை பாத்திமா இரண்டாவதாக திருமணம் செய்து கொண்டார். இந்த திருமண பந்தமும் நீடிக்கவில்லை.

கடந்த 4 ஆண்டுகளுக்கு முன்பு உமருல்லாவை பாத்திமா விவாகரத்து செய்தார். மீண்டும் திருமணம் செய்து கொள்ளாமலேயே அவர்கள் கணவன், மனைவியாக வாழ்ந்தனர்.

இந்த பிரச்சினை அந்த ஊர் பஞ்சாயத்துக்கு வந்தது. பாத்திமாவை கண்டித்த பஞ்சாயத்து தலைவர்கள், உமருல்லாவுடன் சேர்ந்து வாழ தடை விதித்தனர்.ஆனால், பஞ்சாயத்தாரின் தீர்ப்பை மீறி, இரண்டாவது கணவருடன் பாத்திமா சேர்ந்து வாழ்ந்தார். இதை அறிந்த ஊர் தலைவர்கள் மீண்டும் பஞ்சாயத்தை கூட்டினர்.

ஊர்க்காரர்கள் ஏராளமானோர் திரண்டிருக்க, பஞ்சாயத்து தீர்ப்பை மீறிய பாத்திமாவுக்கு மொட்டை அடிக்க தலைவர்கள் உத்தரவிட்டனர். பாத்திமா எதிர்ப்பு தெரிவித்தும் ஊர்த்தலைவர்கள் விடவில்லை. வலுக்கட்டாயமாக பாத்திமாவின் தலையை மொட்டை அடித்தனர்.

பின்னர் அவர் ஊர்வலம் விடப்பட்டார். இதனால் அவமானம் அடைந்த பாத்திமா ஊரை விட்டு வெளியேறினார். பாவுவாகவி போலீசில் அவர் புகார் செய்தார். அவர் அளித்த வாக்கு மூலத்தின் அடிப்படையில், பஞ்சாயத்து தலைவர் உள்ளிட்ட 18 பேர் மீது போலீசார் வழக்குப்பதிவு செய்தனர். தலைமறைவாகி விட்ட குற்றவாளிகளை போலீசார் தேடி வருகின்றனர்.

மாலைமலர்