முகாம்களில் உள்ள தமிழர்களை விரைவில் சொந்த இடங்களுக்கு அனுப்ப வேண்டும் - ஜெயலலிதா

முகாம்களில் உள்ள தமிழர்களை விரைவில் சொந்த இடங்களுக்கு அனுப்ப வேண்டும் என்று இந்தியாவுக்கான இலங்கை தூதரிடம் முதல்-அமைச்சர் ஜெயலலிதா நேரில் வலியுறுத்தினார்.

இதுதொடர்பாக தமிழக அரசு நேற்று வெளியிட்ட செய்திக்குறிப்பில் கூறப்பட்டு இருப்பதாவது:-

இலங்கை தூதர் சந்திப்பு

டெல்லியில் உள்ள இந்தியாவுக்கான இலங்கை தூதர் பிரசாத் கரியவாசம், முதல்-அமைச்சர் ஜெயலலிதாவை தலைமைச் செயலகத்தில் நேற்று மரியாதை நிமித்தமாக சந்தித்தார். அப்போது, பாக்ஜலசந்தியில் மீன்பிடிப்பில் ஈடுபடும் தமிழக மீனவர்கள் இலங்கை கடற்படையால் அவ்வப்போது தாக்கப்படுவது தனக்கு மிகவும் கவலை அளிப்பதாக தெரிவித்த முதல்-அமைச்சர் ஜெயலலிதா, அதுபோன்ற சம்பவங்கள் இனி நடைபெறாமல் இருக்க வேண்டும் என்று இலங்கை தூதரிடம் கேட்டுக்கொண்டார்.

கடந்த 2 மாதங்களில் மூன்று முறை தமிழக மீனவர்கள் சிறைபிடிக்கப்பட்ட சம்பவங்களை சுட்டிக்காட்டிய முதல்-அமைச்சர் ஜெயலலிதா, மீனவர்கள் துன்புறுத்தப்படுவது முற்றிலும் தடுக்கப்பட வேண்டும் என்றும் இலங்கை தூதரிடம் வலியுறுத்தினார்.

ஜெயலலிதா வேண்டுகோள்

இலங்கை முகாம்களில் தங்கியுள்ள தமிழர்கள் தங்கள் சொந்த இடங்களுக்கு விரைவில் திரும்பிச்சென்று மறுவாழ்வு பெறுவதை இலங்கை அரசு உறுதிபடுத்த வேண்டும் என்ற தன்னுடைய விருப்பத்தையும் இலங்கை தூதரிடம் முதல்-அமைச்சர் ஜெயலலிதா தெரிவித்தார்.

மேலும், தமிழக மீனவர்கள் இலங்கை கடற்படையால் தாக்கப்படுவது மற்றும் சிறைபிடிக்கப்படுவது போன்ற சம்பவங்கள் தடுக்கப்பட வேண்டும். முகாம்களில் உள்ள தமிழர்கள் விரைவில் முழு மறுவாழ்வு பெற வேண்டும் என்ற தனது விருப்பத்தை இலங்கை அதிபரிடம் தெரிவிக்குமாறு தூதரை அவர் கேட்டுக்கொண்டார்.

இந்த சந்திப்பின்போது, தென்னிந்தியாவுக்கான இலங்கை துணை தூதர் வி.கிருஷ்ணமூர்த்தி, துணை தூதரக உயர் அதிகாரி அமீத் அஜ்வாத் ஆகியோர் உடனிருந்தனர்.

இவ்வாறு அதில் கூறப்பட்டு உள்ளது.

தினதந்தி

நல்லது , இதை வெறும் பேச்சுவாக்கில் இல்லாமல், அதை செயல்முறைப் படுத்துவதற்கும் தொடர்ந்து இந்திய அரசாங்கத்தை அம்மையார் வலியுறுத்த வேண்டும்.