சிறுநீரகங்கள் செயல் இழந்தன, நடிகர் ரவிச்சந்திரன் கவலைக்கிடம்

by **சிவா** Fri Jul 22, 2011 5:10 am

நடிகர் ரவிச்சந்திரன் கவலைக்கிடமான நிலையில், சென்னை அப்பல்லோ ஆஸ்பத்திரியில் அனுமதிக்கப்பட்டு இருக்கிறார். அவருடைய சிறுநீரகம் செயல் இழந்தது. அவருக்கு செயற்கை சுவாசம் அளிக்கப்படுகிறது.

ரவிச்சந்திரன்

`காதலிக்க நேரமில்லை' படத்தின் மூலம் டைரக்டர் ஸ்ரீதரால் அறிமுகம் செய்யப்பட்டவர், ரவிச்சந்திரன். இதயக்கமலம், குமரிப்பெண், நான், மூன்றெழுத்து, மாடி வீட்டு மாப்பிள்ளை, பாக்தாத் பேரழகி உள்பட ஏராளமான படங்களில் நடித்து இருக்கிறார்.

இவர் நடித்த பெரும்பாலான படங்கள் வெள்ளிவிழா கண்டதால், `வெள்ளிவிழா கதாநாயகன்' என்று பெருமையாக அழைக்கப்பட்டார்.

சிறுநீரக பாதிப்பு

ரவிச்சந்திரனுக்கு 71 வயது ஆகிறது. அவருக்கு கடந்த சில மாதங்களுக்கு முன்பு சிறுநீரக பாதிப்பு ஏற்பட்டது. 2 சிறுநீரகங்களும் செயல் இழந்தன. இதனால் அவருக்கு தினமும் `டயாலிசிஸ்' செய்யப்பட்டது.

இந்த நிலையில் அவருடைய நுரையீரல், கல்லீரல் ஆகியவைகளும் பாதிக்கப்பட்டன. அதைத் தொடர்ந்து அவருக்கு மூச்சுத்திணறல் ஏற்பட்டது. எனவே, அவர் சிகிச்சைக்காக, சென்னை மயிலாப்பூரில் உள்ள ஒரு தனியார் ஆஸ்பத்திரியில் அனுமதிக்கப்பட்டார்.

கவலைக்கிடம்

அவருடைய நிலைமை கவலைக்கிடமாக இருந்ததால், உடனடியாக சென்னை அப்பல்லோ ஆஸ்பத்திரிக்கு மாற்றப்பட்டார். அவருக்கு, டாக்டர்கள் தீவிர சிகிச்சை அளித்து வருகிறார்கள்.

ரவிச்சந்திரன் நினைவாற்றலை முற்றிலுமாக இழந்து, `கோமா' நிலையில் உள்ளார். அவருக்கு மூச்சுத்திணறல் இருப்பதால், செயற்கை சுவாசம் அளிக்கப்படுகிறது.

அவருடைய மனைவி விமலா, மகன் நடிகர் அம்சவர்தன் ஆகிய இருவரும் அருகில் இருந்து கவனித்து வருகிறார்கள்.

தினதந்தி