திரும்புகிறது அட்லான்டிஸ்

நாளை பூமி திரும்புகிறது அட்லான்டிஸ்

பதிவு செய்த நாள் : 7/20/2011 16:45:23


கேப் கேனவரல்: சர்வதேச விண்வெளி இருந்து நேற்று புறப்பட்ட அட்லான்டிஸ் விண்கலம் நாளை பூமிக்கு திரும்புகிறது. இத்துடன் விண்வெளிக்கு சென்று வந்த அமெரிக்காவின் விமான மாடல் விண்கலங்களின் 30 ஆண்டு கால சகாப்தம் முடிவடைகிறது.
விண்வெளிக்கு வீரர்களையும், பொருட்களையும் அனுப்ப அமெரிக்க விண்வெளி ஆராய்ச்சி மையம் (நாசா) சேலஞ்சர், கொலம்பியா, டிஸ்கவரி, அட்லான்டிஸ், எண்டவர் ஆகிய விண்கலங்களை 1980-ம் ஆண்டுகளில் இருந்து பயன்படுத்த தொடங்கியது. விமான வடிவிலான இந்த விண்கலங்களில் 7 விண்வெளி வீரர்கள் வரை பயணம் செய்யலாம். 22 ஆயிரத்து 700 கிலோ எடை வரை பொருட்களையும் எடுத்துச் செல்லலாம். விண்வெளிக்கு முதல் பயணத்தை கொலம்பியா விண்கலம் 1981-ம் ஆண்டு தொடங்கியது. அதன் பின் மற்ற விண்கலங்கள் விண்வெளிக்கு சென்று திரும்பின.
சேலஞ்சர் விண்கலம் 1986-ம் ஆண்டு விபத்தில் சிக்கியது. ஏவுதளத்தில் இருந்து புறப்பட்ட 73 நொடியில், ராக்கெட் பூஸ்டர் செயல் இழந்ததால் வெடித்தது. அதில் பயணம் செய்த 7 வீரர்கள் பலியாயினர். அடுத்ததாக கொலம்பியா விண்கலம் 2003-ம் ஆண்டு விபத்தில் சிக்கியது. விண்கலத்தின் வெப்ப பாதுகாப்பு ஓடுகள் சேதமடைந்திருந்ததால், விண்வெளியில் இருந்து வளிமண்டலத்துக்குள் நுழைந்தபோது அதிக வெப்பம் காரணமாக கொலம்பியா வெடித்து சிதறியது. இதில் இந்திய வம்சாவளி பெண் கல்பனா சாவ்லா உள்பட 7 வீரர்கள் பலியாயினர்.
அமெரிக்கா, ரஷ்யா, ஐரோப்பிய நாடுகள், ஜப்பான் ஆகியவற்றின் கூட்டு முயற்சியில் விண்வெளியில் சர்வதேச ஆய்வு மையம் கட்டுவதற்கு அமெரிக்க விண்கலங்கள் முக்கிய பங்காற்றின. பல்வேறு ஆராய்ச்சிகளுக்கு தேவையான லேப்கள் மற்றும் உபகரணங்கள், விண்வெளி மையத்தில் நீண்ட காலம் தங்கி ஆராய்ச்சி மேற்கொள்ளும் வீரர்களுக்கு தேவையான உணவுப் பொருட்களை அமெரிக்க விண்கலங்கள் கொண்டு சென்றன.
இந்த விண்கலங்கள் கடந்த ஆண்டுடன் ஓய்வு பெறுவதாக இருந்தது. ஆனால் இந்த ஆண்டு வரை நீட்டிக்கப்பட்டது. டிஸ்கவரி, எண்டவர் விண்கலங்கள் ஏற்கனவே தங்கள் கடைசி பயணத்தை முடித்துவிட்டு மியூசியங்களுக்கு செல்ல தயாராகி கொண்டிருக்கின்றன. அட்லான்டிஸ் விண்கலம் கடந்த 8-ம் தேதி தனது கடைசி பயணத்தை தொடங்கியது. இதில் 4 வீரர்கள் சென்றனர். நாசா விண்கலத்தின் கடைசி பயணம் (135-வது முறை) என்பதால் ஆயிரக்கணக்கான மக்கள் வேடிக்கை பார்த்தனர். ஒரு ஆண்டுக்கு தேவையான அத்தியாவசியப் பொருட்களை எடுத்துக் கொண்டு அட்லான்டிஸ் சென்றது. நேற்று பூமிக்கு புறப்பட்ட அட்லான்டிஸ், சர்வதேச விண்வெளி மையத்தில் குவிந்து கிடக்கும் தேவையற்ற பொருட்களை எடுத்துக் கொண்டு வருகிறது. இது நாளை தரையிறங்கியவுடன் மியூசியத்துக்கு காட்சி பொருளாக அனுப்பப்படுகிறது. இத்துடன் அமெரிக்க விண்கலங்களின் 30 ஆண்டு கால சகாப்தம் முடிவுக்கு வருகிறது.
விமான மாடல் விண்கல தயாரிப்பில் அமெரிக்கா மீண்டும் ஈடுபடப் போவதில்லை. இந்த மாடல் விண்கலத்தை ஒருமுறை விண்ணுக்கு அனுப்பினால் நாசாவுக்கு ஆகும் செலவு ரூ.6,750 கோடி. செலவு குறைக்கும் விதத்திலும், பாதுகாப்பு வசதிகளை மேம்படுத்தும் விதத்திலும், கேப்சூல் மாடல் விண்கலங்களை தயாரிக்க நாசா முடிவு செய்துள்ளது. அடுத்த விண்வெளி பயணத்துக்கு ஓரியன் கேப்சூல் வகை விண்கலங்களை பயன்படுத்த நாசா திட்டமிட்டுள்ளது. இதற்கு இன்னும் 3 முதல் 5 ஆண்டு வரை ஆகலாம். அதுவரை ரஷ்யாவின் சோயுஸ் ராக்கெட் மூலம் செல்லும் கேப்சூல் வகை விண்கலங்கள் சர்வதேச விண்வெளி மையத்துக்கு சென்று வரும்.