ஜெயகுமார் விடுவிக்கப்பட வேண்டும் என 5,000 மருத்துவர்கள் கோரிக்கை

சுங்கை சிப்புட் எம்பி டாக்டர் டி ஜெயகுமார் விடுவிக்கப்பட வேண்டும் என 5,000க்கும் மேற்பட்ட தனியார் மருத்துவர்களை உறுப்பினர்களாகக் கொண்ட தனியார் துறை மருத்துவர் சங்கச் சம்மேளனம் கேட்டுக் கொண்டுள்ளது.

ஏற்கனவே மருத்துவத்துறை சார்ந்த பல அமைப்புக்கள் ஜெயகுமார் விடுதலை செய்யப்பட வேண்டும் எனக் கோரிக்கை விடுத்துள்ளன.

“எங்கள் சகா டாக்டர் ஜெயகுமார் தேவராஜ் தொடர்ந்து தடுத்து வைக்கப்பட்டிருப்பது குறித்து நாங்கள் மிகவும் கவலை அடைந்துள்ளோம். அவர் சட்டத்தை பின்பற்றுகிற, திறமையான, இரக்க குணமுள்ள, விவேகமான மருத்துவர் என நாங்கள் கருதுகிறோம். அங்கீகரிக்கிறோம்.”

“அவருடைய பொதுச் சேவைகள் மிகவும் மெச்சத்தக்கது. எங்களுக்குத் தெரிந்த வரையில் அவர் நமது சமுதாயத்துக்கு நிச்சயம் மருட்டலாக இல்லை”, என அந்த சம்மேளனம் விடுத்த ஊடக அறிக்கை கூறியது.

ஜெயகுமார் நீண்ட காலம் அரசாங்கச் சேவையில் பணியாற்றியுள்ளதாகவும் “மக்களுக்கு தன்னலமற்ற சேவைகள்” வழி பல நல்ல பணிகளை செய்துள்ளதாகவும் அது குறிப்பிட்டது.

இன, சமய வேறுபாடு கருதாமல் அனைவரையும் இரக்க சிந்தனையுடனும் தர்ம சிந்தனையுடனும் கவனித்து வரும் சிறந்த மருத்துவர் என்றும் அந்த அறிக்கை கூறியது.

“நாங்கள் ஜெயகுமாருக்கு எதிராக விதிக்கப்பட்ட தடுப்புக் காவல் ஆணை அகற்றப்பட வேண்டும் என முறையீடு செய்து கொள்கிறோம்.”

அதே சூழ்நிலைகளில் தடுத்து வைக்கப்பட்டுள்ள மற்ற மலேசிய சோஷலிசக் கட்சி உறுப்பினர்களும் விடுவிக்கப்பட வேண்டும் என்றும் அந்தச் சம்மேளனம் கேட்டுக் கொண்டது.

சட்டவிரோதம் என அறிவிக்கப்பட்டுள்ள பெர்சே 2.0 பேரணிக்கு திட்டமிட்டதில் சம்பந்தப்பட்டதாக கூறப்படும் குற்றச்சாட்டின் பேரில் ஜெயகுமாரும் மேலும் ஐந்து மலேசிய சோஷலிசக் கட்சி உறுப்பினர்களும் அவசர காலச் சட்டத்தின் கீழ் தடுத்து வைக்கப்பட்டுள்ளனர்.

மலேசிய மருத்துவ மன்றத்தின் பேராக் மாநில கிளை மற்றும் பேராக் மருத்துவத் தொழில் நடத்துபவர்கள் அமைப்பு ஆகியவற்றின் 176 உறுப்பினர்கள் இதுபோன்ற கோரிக்கையை இதற்கு முன்னதாக விடுத்துள்ளனர்.

ஜெயக்குமார் “சட்டவிரோதமாக” தடுத்து வைக்கப்பட்டிருப்பதும் தடுத்து வைக்கப்பட்டிருப்பதால் பாதிக்கப்படும் அவரது உடல்நிலையும் எங்களுக்கு மனவேதனையை அளிக்கிறது என்று மருத்துவர்கள் கூறியுள்ளனர்.

அந்த மருத்துவ சம்மேளனத்தின் தலைவர் டாக்டர் ஸ்டீபன் கேடபுள்யு சௌ அக்கடிதத்தில் கையெழுத்திட்டுள்ளார்.

மலேசியாஇன்று