அம்பலமாகிறது மாஜி அமைச்சர் நேருவின் ஹோட்டல் ‘ஆட்டம்’

திருச்சி, இந்தியா: மத்திய பேருந்து நிலையம் அருகேயுள்ள ஹோட்டல் ஒன்றை அபகரிப்பதற்காக, தி.மு.க.வின் முன்னாள் அமைச்சர் கே.என். நேரு ஆடிய ஆட்டம், இப்போது கோர்ட்வரை போகவுள்ளது. முன்னாள் அமைச்சர் கே.என். நேரு, துணை மேயர் மு. அன்பழகன் உட்பட 11 பேர் மீது திருச்சி மாநகர காவல் ஆணையரிடம் புகார் அளிக்கப்பட்டுள்ளது.

குறிப்பிட்ட ஹோட்டல், திருச்சி மத்திய பஸ் நிலையத்துக்கு அருகே உள்ளது. இந்த ஹோட்டலை வாங்குவதில் முன்னாள் அமைச்சர் கே.என். நேரு, அவருடைய சகோதரர் கே.என். ராமஜெயம் ஆகியோர் ஆர்வமாக இருப்பதாக ஹோட்டலை நடத்தியவரிடம் முதலில் அன்பாகச் சொல்லியிருக்கின்றது அமைச்சர் தரப்பு.

ஆனால், ஹோட்டலை நடத்தியவர் அமைச்சரின் அன்பு உள்ளத்தைப் புரிந்துகொள்ளவில்லை. இதையடுத்து அமைச்சரையும் அவரது சகோதரரையும் மீறி, திருச்சி பஸ் ஸ்டான்ட் அருகே தொழில் நடத்த முடியாது என்று ‘சிட்சுவேஷன் ரிப்போர்ட்’ ஹோட்டல் நடத்தியவருக்கு அப்போதைய அமைச்சர் தரப்பால் கொடுக்கப்பட்டுள்ளது.

பாவி மனுஷன், அதையும் புரிந்துகொள்ளவில்லை.

இந்தக் கட்டத்தில் கே.என். நேரு அவர்களுக்கு, பாட்சா திரைப்படம்தான் ஞாபகம் வந்திருக்க வேண்டும். அவர் “யோவ், எனது பெயர் கே.என். நேரு.. எனக்கு வேறு ஒரு பெயரும் இருக்கிறது..” என்று செயலில் இறங்கினார்.

ஒரு நாள் நள்ளிரவுக்குப் பின் 1.30 மணிக்கு, தி.மு.க. கொடி கட்டிய காரில் செயல் வீரர்கள் வந்தார்கள். வந்தவர்கள், ஹோட்டலை அடித்து நொறுக்கிவிட்டுப் பணியாளர்களை விரட்டினர்.

அமைச்சர் நேரு தன்னுடைய ஆட்களை மதியம் சாப்பாட்டு நேரத்தில் ஹோட்டலை அடித்து நொருக்க அனுப்பியிருக்கலாம். அப்படிச் செய்தால், மக்களுக்கு இடையூறாக இருக்கும் என்று நள்ளிரவில் ஆட்களை அனுப்பிய அமைச்சரின் உயர்ந்த குணத்தைப் புரிந்து கொள்ளாமல், ஹோட்டல் நடத்தியவர் போலீஸில் புகார் கொடுக்க முயன்றிருக்கிறார்.

திருச்சி கன்டோன்மென்ட் போலீஸ் ஸ்டேஷனில் காவல் ஆய்வாளராக அப்போது இருந்தவர் சுவாமிநாதன். அவருடன் ஹோட்டல் நடத்தியவர் தொலைபேசியில் பேசியபோது, போலீஸ் இந்தக் கேஸை எடுக்கத் தயாராக இல்லை. ஆனால், ஏதோ தன்னால் முடிந்தது, ஒரு இலவச அட்வைஸ் கொடுத்திருக்கிறார் சுவாமிநாதன்.

“அமைச்சர் அல்லது அவரது தம்பி ஆசைப்படுவதைத் தடுப்பது மகா பாவம். அந்தக் காரியத்தைச் செய்ய எம்மால் இயலாது. முடிந்தால், அமைச்சரின் தம்பியிடம் சமரசமாகச் செல்லுங்கள். முடியாவிட்டால், ஹோட்டலை மறந்து விடுங்கள்” என்பதே அட்வைஸ்.

ஹோட்டல் நடாத்தியவரும் கில்லாடிதான். அவர், இந்த உரையாடலை பதிவு செய்து விட்டார்!

இப்போது ஆட்சிமாறி விட்டது. முன்னாள் அமைச்சர் நேரு, ஹோட்டலுக்கெல்லாம் ஆசைப்படுவதில்லை. காவல்துறை ஆட்கள் தன்மீது ஆசைப்படாமல் விட்டாலே போதும் என்று அடக்க ஒடுக்கமாக இருக்கிறார். அப்படியிருந்தும், இந்த அப்பாவி அமைச்சர்மீது திருச்சி மாநகர காவல் ஆணையரிடம் புகார் அளிக்கப்பட்டுள்ளது.

இது முடிவல்ல.. ஆரம்பம் என்கிறார்கள் திருச்சிவாசிகள்.