அறிவாலயத்தில போயி கேளு! அட்டாக் பாண்டி மேல ஏழு

நில அபகரிப்பு குற்றச்சாட்டில் கைது செய்யப்பட்ட தி.மு.க. அதிரடி பிரமுகர் அட்டாக் பாண்டிமீது 7 பிரிவுகளின் வழக்குப்பதிவு செய்யப்பட்டுள்ளது. மதுரை தி.மு.க. வட்டாரங்களில் இச் சம்பவம் பெரும் பதட்டத்தை ஏற்படுத்தியுள்ளது. கோர்ட்டில் ஆஜர்படுத்திவிட்டு அவரைச் சிறையில் அடைத்தனர் போலீசார்.

தி.மு.க. தலைவர் கருணாநிதி, தமது கட்சிக்காரர்களுக்கு காவல்துறை இம்சை கொடுப்பதாகவும், அது குறித்து உடனுக்குடன் தன்னை அறிவாலயத்தில் தொடர்பு கொண்டு தகவல் தெரிவிக்கலாம் என்றும் அறிவித்திருந்தார். ஆனால், அவரது உள்வீட்டுக் குழப்பங்கள் காரணமாக ஒருநாள் அறிவாலயம் பக்கமே வராமல் மாமல்லபுரம் ரிசார்ட்டுக்குச் சென்றுவிட்டார்.

தற்போது அவர், தனது குடும்பத்தினரைச் சமாதானப்படுத்தும் பணியில் பிசியாக இருக்கிறார்.

சிறையில் அடைக்கப்பட்டுள்ள மேதகு அட்டாக் பாண்டி அவர்கள், கட்சிப் பணிகளைக் கவனித்த காரணத்தால் கைது செய்யப்படவில்லை. கட்சிப் பணிகளைவிட, ‘சைட்-ட்ராக்காக’ இவர் கவனித்துவந்த ‘மிரட்டி நிலம் பறித்தல்’ என்ற உயர்ந்த பணிக்காகவே கைதாகியுள்ளார்.

பிரமுகர் அட்டாக் பாண்டிமீது இந்திய தண்டனை சட்டம் 406, 420, 427, 448, 468, 471, 506 ஆகிய 7 பிரிவுகளின் கீழ் மாத்திரம் வழக்குப் பதிவு செய்யப்பட்டுள்ளது. மிகுதிப் பிரிவுகளின் கீழ் எப்போது பதிவாகும் என்பதை யாரும் சொல்லவில்லை.

அண்ணன் நீதிமன்ற திக்விஜயம் மேற்கொண்டபோது..

இவரிடம் விசாரிப்பதற்கு போலீசாருக்கு நிறையவே விஷயங்கள் இருந்தன. சும்மாவா? இவரது 5 வருட தொடர் பணிகள் பற்றியல்லவா விசாரிக்க வேண்டும்? இதனால் மதுரை போலீஸார் அண்ணனிடம் விடிய, விடிய விசாரணை நடத்தினர்.

வியாழக்கிழமை இரவு ஆரம்பித்த விசாரணைகள் நேற்று (வெள்ளிக்கிழமை) அதிகாலைவரை தொடர்ந்தபின், அவர் நேற்று காலை கோர்ட்டில் ஆஜர்படுத்தப்பட்டு, சிறையில் அடைக்கப்பட்டுள்ளார்.

மதுரை தி.மு.க.வின் நட்சத்திர பிரமுகரும், மத்திய அமைச்சர் மு.க.அழகிரியின் தீவிர ஆதரவாளருமான அட்டாக் பாண்டி அவர்களைக் கைது செய்திருப்பது, தி.மு.க.வினரிடையே பெரும் பரபரப்பை ஏற்படுத்தி உள்ளது.

இந்த அண்ணன்மீது மாத்திரமின்றி, வேறு பல தி.மு.க.வினர் மீதும் பல புகார்கள் வந்து குவிந்து கொண்டிருப்பதாகத் தெரிவித்துள்ள மதுரை போலீஸார், அவர்களை ஒவ்வொருவராக அழைத்து, அரவணைத்து, விசாரிக்கவுள்ளதாகத் தெரிவித்துள்ளனர்.

அட்டாக் பாண்டிக்கே அட்டக்கா...!