மகத்துவம் தரும் ஆடி பிறந்தது: அம்மன் கோவில்கள் விழாக்கோலம் பூண்டது

மகத்துவம் தரும் ஆடி மாதம் நேற்று பிறந்ததையொட்டி, சென்னையில் உள்ள அம்மன் கோவில்கள் விழாக்கோலம் பூண்டது. பெண்கள் அங்கப்பிரதட்சணம் செய்தும், கூழ் ஊற்றியும் அம்மனை வழிபட்டனர்.

மகத்துவம் தரும் ஆடி

தமிழ் மாதங்களில் தெய்வீக மணம் கமழுவதாக ஆடி மாதம் அமைந்துள்ளது. கருமாரியம்மன், மாரியம்மன், பெரியபாளையத்தம்மன் என பெண் தெய்வங்களான அம்மன்களைப் போற்றுவதற்குரிய மாதமாகவும் ஆடி அமைந்துள்ளது. ஆடி மாதத்தில் மாரியம்மன் கோவில்களில் மற்ற மாதங்களைக்காட்டிலும் அதிக விழாக்கள் எடுக்கப்படுகிறது.

ஆடி மாதத்தில் வரக்கூடிய செவ்வாய்க்கிழமை, வெள்ளிக்கிழமை மிகவும் விசேஷமானவையாக போற்றப்படுகிறது. செவ்வாய், வெள்ளிக்கிழமைகளில் அம்மனுக்கு அபிஷேகம் செய்வதற்காக, பெண்கள் பால்குடம் சுமந்து சென்று அவர்களே அம்மனுக்கு பாலாபிஷேகம் செய்கிறார்கள்.

விழாக்கோலம்

பக்தியின் மகத்துவத்தை உணர்த்தும் ஆடி மாதம் நேற்று பிறந்ததையொட்டி சென்னையில் உள்ள அம்மன் கோவில்கள் விழாக்கோலம் பூண்டது. நேற்று அதிகாலை முதலே கோவில்களில் நடைவாசல்கள் திறக்கப்பட்டு பூஜைகள் நடைபெற்றது. காலை முதலே பெண்கள் கூட்டம் கோவில்களில் அலை மோத தொடங்கியது. வேப்பில்லை கட்டி அங்கபிரதட்சணம், பால் குடம், கூழ் ஊற்றுதல் என்று பக்தி மணம் கமழ `களை' கட்டியது கோவில்கள்.

சென்னை மைலாப்பூரில் உள்ள முண்டகக்கண்ணியம்மன் கோவிலில் நேற்று அதிகாலை 4.30 மணிக்கு நடை திறக்கப்பட்டு, பூஜைகள் நடைபெற்றது. இந்த பூஜையில் ஆயிரக்கணக்கான பக்தர்கள் கலந்து கொண்டு, அம்மனை தரிசனம் செய்தனர். இதை தொடர்ந்து நேர்த்திக்கடனை செலுத்த வந்த பெண் பக்தர்கள் 2 ஆயிரம் பேர் உடல் முழுவதும் வேப்பிலையையே ஆடையாக அணிந்து கொண்டு அம்மனின் நாமத்தை உச்சரித்தப்படி அங்கபிரதட்சணம் செய்தனர்.

மஞ்சள் ஆடை அணிந்து வந்த பெண்கள் கோவில் முன்பு பொங்கல் வைத்து, அம்மனை வழிபட்டனர். கோவில் உள்ளே இருந்த நாக புற்றுக்கு பெண்கள் பால் ஊற்றி பயபக்தியுடன் வழிபட்டனர். கோவிலுக்கு வந்த பக்தர்களுக்கு குங்கும பிரசாதம் வழங்கப்பட்டது. கோவில் நிர்வாகம் சார்பில் பக்தர்களுக்கு கோவில் வளாகத்தில் கூழ் வழங்கப்பட்டது.

காளிகாம்பாள்

ஆடி மாத திருவிழாவையொட்டி ஆகஸ்ட் 2-ந் தேதி பூச்சொரிதல் விழா நடைபெற உள்ளது. இந்த நிகழ்ச்சியில் 1,008 பெண்கள் கலந்து கொள்கிறார்கள். பூஜையில் கலந்து கொள்ளும் பெண்களுக்கு அம்மனுக்கு சாத்தப்பட்ட புடவைகள் இலவசமாக வழங்கப்பட உள்ளது.

சென்னை பிராட்வே தம்புச்செட்டி தெருவில் உள்ள காளிகாம்பாள் கோவிலில் நேற்று காலை முதலே ஏராளமான பக்தர்கள் குவிந்த வண்ணம் இருந்தனர். இதையொட்டி கோவில்களில் சிறப்பு ஏற்பாடுகள் செய்யப்பட்டு இருந்தது. 108 பெண்கள் பால் குடம் எடுத்து வந்து, பூஜைகளில் கலந்து கொண்டனர்.

சென்னை அமைந்தகரை வேம்புலி அம்மன் கோவிலில் 750 பெண் பக்தர்கள் பால் குடம் எடுத்து வந்து, பூஜைகளில் பங்கேற்றனர்.

திருவேற்காடு கருமாரியம்மன் கோவில், பெரியபாளையத்தமன் கோவில்களில் நேற்று காலை முதலே கோவில் நடை திறக்கப்பட்டு பூஜைகள் நடைபெற்றது. பெண்கள் பால் குடம் எடுத்து வந்தும், பாம்பு புற்றுக்கு பால் ஊற்றியும் வழிபட்டனர். நேர்த்திக்கடனுக்காக பெண்கள் வேப்பிலை அணிந்து அங்க பிரதட்சணம் செய்தனர்.