கெடா, ரமதான் மாதத்தில் மதுபான, நடன விடுதிகளை மூடும் யோசனையைக் கைவிடுகிறது

ரமதான் முஸ்லிம் நோன்பு மாதத்தில் மதுபான, நடன விடுதிகளை மூடும் யோசனையை பாஸ் என்ற எதிர்த்தரப்பு இஸ்லாமியக் கட்சியின் கட்டுக்குள் இருக்கும் கெடா மாநிலம் கைவிடுகிறது.

ஞாயிற்றுக்கிழமை மாநில அரசாங்க அதிகாரி ஒருவர் இன்று அந்தத் தகவலை வெளியிட்டார்.

பிரபலமான லங்காவி சுற்றுலாத் தீவு உட்பட கெடா மாநிலம் முழுவதும் அடுத்த மாதம் தொடங்கும் ரமதான் போது எல்லா பொழுதுபோக்கு மய்யங்களையும் மூடுவது என அந்த மாநில அரசாங்கம் கடந்த மே மாதம் முடிவு செய்தது.

ஆனால் அந்த யோசனைக்கு பொழுதுபோக்கு மையங்களை நடத்துகின்றவர்கள் கடும் எதிர்ப்புத் தெரிவித்தனர்.

பாஸ் கட்சியின் பக்காத்தான் கூட்டணித் தோழமைக் கட்சிகளும் அத்தகைய முழுமையான தடை முஸ்லிம் அல்லாத வாக்காளர்களைத் திசை மாறச் செய்து விடும் என்றும் அஞ்சின.

அதனைத் தொடர்ந்து நேற்று பொழுதுபோக்கு மையங்களின் உரிமையாளர்கள் மாநில முதலமைச்சரைச் சந்தித்தினர். அந்தச் சந்திப்பில் சர்ச்சை தீர்க்கப்பட்டதாக மாநில அதிகாரி தெரிவித்தார்.

அந்த பொழுதுபோக்கு மையங்களில் முஸ்லிம்கள் இல்லாதிருப்பதை உறுதி செய்யும் வரையில் அவற்றை நடத்துவதற்கு மாநில முதலமைச்சர் ஒப்புக் கொண்டதாக அவர் சொன்னார்.

“முஸ்லிம்கள் மீது நாங்கள் தனிக் கவனம் செலுத்த வேண்டியுள்ளது. ஏனெனில் பல இளைஞர்கள் பொழுதுபோக்கை மட்டுமே இலட்சியமாகக் கொண்டுள்ளனர். மாநில அரசாங்கம் அதனை விரும்பவில்லை.”

ரமதான் மாதத்தில் முஸ்லிம் அல்லாதாருக்கு மட்டுமே பொழுதுபோக்கு மையங்கள்

அந்த விதிமுறையை நாடு முழுவதும் இஸ்லாமிய அதிகாரிகள் அமல்படுத்துவர் என்றும் அந்த அதிகாரி தெரிவித்தார். அவர்கள் மாநிலம் முழுவதும் உள்ள 300க்கும் மேற்பட்ட மதுபான, நடன விடுதிகளைக் கண்காணிப்பர் என்றார் அவர்.

மலேசியாவில் வாழும் 28 மில்லியன் மக்களில் 60 விழுக்காட்டினராக இருக்கும் முஸ்லிம் மலாய்க்காரர்களிடமிருந்து பாஸ் கட்சிக்கு முக்கிய ஆதரவு கிடைத்து வருகிறது. ஆனால் இப்போது அந்தக் கட்சி மதச் சார்பற்ற சீனர்களை அடித்தளமாகக் கொண்ட டிஎபி என்ற ஜனநாயகச் செயல் கட்சியுடனும் அன்வார் இப்ராஹிமின் பிகேஆர் என்ற மக்கள் நீதிக்கட்சியுடனும் கூட்டு சேர்ந்துள்ளது.

இஸ்லாத்தில் உணர்ச்சியைத் தூண்டும் விஷயங்கள் எனக் கருதப்பட்ட -பன்றி வளர்ப்பு, மதுபானத் தடை ஆகிய விஷயங்களில்- பாஸ் கட்சிக்கும் டிஎபிக்கும் இடையில் கடந்த காலத்தில் தகராறுகள் மூண்டுள்ளன.

அதனால் எதிர்த்தரப்புக் கூட்டணி சிதறுவதற்கான அச்சம் ஏற்பட்டு கடந்த 50 ஆண்டுகளுக்கும் மேலாக நாட்டை ஆட்சி புரியும் பாரிசான் நேசனலை வீழ்த்தும் வாய்ப்புக்களும் மங்கியுள்ளன.

ஏஎப்பி & மலேசியாஇன்று