சமச்சீர் கல்வி வழக்கில் நல்ல தீர்ப்பு வரும்: மு.க.ஸ்டாலின் பேச்சு

by திமுக Sun Jul 17, 2011 6:24 pm

ராயபுரம் பகுதி தி.மு.க. சார்பில் உயர்நிலை செயல் திட்டக்குழு தீர்மான விளக்க பொதுக்கூட்டம் ராயபுரம் பாலுமுதலி தெருவில் நடந்தது. கூட்டத்துக்கு பகுதி செயலாளர் கட்பீஸ் பழனி தலைமை வகித்தார். மாவட்ட பொறுப்பாளர் ஆர்.டி.சேகர், பி.கே.சேகர்பாபு, டன்லப் ரவி, தா.இளைய அருணா முன்னிலை வகித்தனர்.

கூட்டத்தில் மு.க.ஸ்டாலின் கலந்து கொண்டு பேசியதாவது:-

2006-2011வரை நடைபெற்ற தி.மு.க. ஆட்சியில் மக்களுக்கு ஏராளமான நலத்திட்டங்களை செயல்படுத்தி உள்ளோம். போக்குவரத்து நெரிசலை குறைக்க புதிய மேம்பாலங்கள் அமைத்துள்ளோம். நிறைவேற்றவே முடியாது என்று கூறிய பெரம்பூர் மேம்பாலத்தை கட்டி முடித்தோம். சாதனை திட்டங்கள் பல நிறைவேற்றியும் இந்த தேர்தலில் நாம் எப்படி தோற்றோம் என்று புரிய வில்லை. எப்படி ஜெயித்தோம் என்று அவர்களுக்கும் புரியவில்லை.

இந்த கல்வியாண்டில் நிறைவேற்றப்பட இருந்த சமச்சீர் கல்வி திட்டத்தினை அ.தி.மு.க. அரசு அவசர தீர்மானம் நிறைவேற்றி ரத்து செய்துள்ளது. புதிய பாடநூல்கள் நிறுத்தி வைக்கப்பட்டுள்ளது. இதுதொடர்பான வழக்கில் நாளை நாம் எதிர்பார்க்கும் நல்ல தீர்ப்பு வரும். கலைஞர் கட்டிய கட்டிடம் அதில் நாம் எப்படி அமர்வது என்ற ஒரே காரணத்துக்காகவும் வாஸ்து சாஸ்திரத்துக்காகவும் புதிய தலைமை செயலகத்தை மூடிவிட்டனர்.

மக்கள் வரிப்பணத்தில் கட்டப்பட்ட இந்த கட்டிடத்தை வீணாக்கி வருகின்றனர். இப்போது போலீஸ்காரர் வீட்டிலேயே கொள்ளை நடக்கிறது. கொலை நடக்கிறது. அ.தி.மு.க. அரசு பதவி ஏற்று இன்றுடன் 60 நாட்கள் ஆகிறது. குற்றங்கள் பெருகி உள்ளது. நில அபகரிப்பு வழக்கு தொடர பத்திரப்பதிவு அலுவலகங்களில் 2006 முதல் 2011 வரை பதிவு செய்யப்பட்ட நிலங்களை கணக்கெடுத்து வருகின்றனர். இதை 2001-ல் இருந்து கணக்கெடுக்க வேண்டும். தி.மு.க. ஆட்சி பொறுப்பில் இருந்தாலும் இல்லா விட்டாலும் மக்கள் பணி தொடரும்.

இவ்வாறு மு.க.ஸ்டாலின் பேசினார்.

கூட்டத்தில் டி.கே.எஸ். இளங்கோவன் எம்.பி., மேயர் மா.சுப்பிரமணியன், சற்குணபாண்டியன், முன்னாள் எம்.எல்.ஏ. சேகர்பாபு, ஆர்.டி.சேகர், கட்பீஸ் பழனி, டன்லப் ரவி, செங்கை சிவம், மதிவாணன், பாண்டிச்செல்வம், இலக்கிய அணி வக்கீல் துலுக்காணம், கவுன்சிலர் சிவலிங்கம், அருளரசன், 16-வது வட்ட செயலாளர் ஜெயபாலன், துணை செயலாளர் பி.சேகர், இளைஞரணி பொன் பாண்டியன், சண்முகம், சுந்தர், குமார், பி.எஸ்.வெங்கடேசன் உள்பட பலர் கலந்து கொண்டனர்.

நன்றி மாலைமலர்